Director di SETAR ing. Roland Croes:
ORANJESTAD (AAN): Director di SETAR NV, ing. Roland Croes, den entrevista cu Matutino DIARIO a duna informacion tocante e resultado di e “Setar Digital Week”.
Señor Croes a señala cu e motibo principal di e actividad aki ta pa hiba Aruba den un nivel mas halto di learning. Esnan cu a sigui e actividad aki tur dia, a haya un bista completo di unda e mundo digital ta bayendo.
El a indica cu tur e programanan cu SETAR a purba traha tin e meta di informa riba tur e aspectonan di loke ta pasando den e mundo awendia. E parti digital ta papia di futuro, ecologia, security, etc., y a logra un meta hopi bon mes cu ta pa pueblo bira mas atento y tur dia ta up to date cu e meta cu pa SETAR ta “Learning”.
Tambe el a menciona cu Movimento ta Bida ta un di e fundacionnan unda SETAR ta bay y duna nan training y loke ta importante ta, cu hasta nan ta haci sesionnan di “Train the trainers”.
“Kiermen, nos ta train algun hende di nan cu kier siña auto-learning y esey ta mas of menos un movimento. Mi ta spera cu hende cu ta scucha esaki por siña otro hende tambe, pasobra Aruba mester di esey”, ing. Roland Croes a remarca.
Croes a expresa cu e mundo ta bayendo den un velocidad awo fuera di lo normal, y ta espantoso vooral ora hende bira di mas edad, pa nan no bay atras. El a subraya cu SETAR lo sigui cu e trabao di informa Aruba y yuda sigui desaroy’e. SETAR ta preparando su mes pa e proximo cinco añanan, unda ta bay bin hopi mas novedad, pero banda di esey loke e ta nifica pa pueblo, negoshi, etc., den bista di SETAR ta un uso mas fuerte di e tecnologia ey. Internet ta bay manda, pero aplicacionnan cu ta bay wordo desaroya bo no tin ni idea kico nan ta, y cu hopi tipo di cos ta wordo haci awe, pa haci mas facil cu AI. “Mi ta kere cu e lo caba cu trabao di cierto hende si nan keda na loke nan ta haciendo awe. Abo tin cu bay link. Loke ta pasa ta cu AI ta bay yuda bo haci mas cos cu bo no ta caba mes, e ta bay crea productonan mas nobo ainda y mas impresionante. Segun mi, esaki no tin fin, pero bo mester sigui siña si”, Señor Roland Croes a enfatiza.
