Cristalyne Kock a debuta cu su prome coleccion ‘Hermosa en Rosa’

Durante show recien di Glitz, Glam & Glow

ORANJESTAD (AAN): E diseñado hoben local y talentoso Cristalyne Kock a haci su debut deslumbrante cu su prome coleccion di moda, “Hermosa en Rosa,” durante e show espectacular Glitz, Glam & Glow: The Ultimate Next Gen Runway, organiza pa The Chaz Modeling and Talent School.

   E coleccion, inspira den diferente tono di roos cu ta suave y fuerte, cu combinacion cu color preto, ta celebra hubentud, confianza y creatividad reflehando e vision fresco y e pasion pa diseño di Cristalyne. “Hermosa en Rosa” ta captura e esencia di estilo moderno y individualidad, cu un toke di alegria y estilo sofistica. E fantasia y estilo propio ta loke ta resalta.

   Esaki tabata un gran momento pa Cristalyne, pasobra tabata su prome presentacion publico como diseñado, un logro notabel cu ta mustra su dedicacion, imaginacion y potencial den e mundo di moda.

Cristalyne kier a duna masha danki na tur hende cu a yuda pa haci esaki posibel, inclui su costurera Merida Quant, cu a duna bida na su idea y su ruman Caithlyne Kock a yuda cu e tokenan esencial cu ta e decoracion.

   Tambe un danki special pa su modelonan fabuloso cu a worde selecta pa su mesun persona pa desfila su diseñonan cu ta Carolyne, Caithlyne, Jarzhienne, Sheldry, Jayron, Valentina, Danielle, Marcieny y Jessica cu a briya riba e pasarela cu elegancia y estilo. Y tambe un danki pa Ciara cu a haci e intro pa cu e pasarela di Hermosa y Rosa.

   E coleccion tabata tin su propio tema musical cu a laga un toke extra magico. E tema musical tambe yama “Hermosa en Rosa”.

   “Tabata un soño cu a bira realidad pa mira mi diseño nan haja bida riba e escenario,” ta loke Cristalyne a declara. “Mi ta masha agradecí na tur hende cu a yuda mi for di mi costurera cu a kere den mi vision te na e modelonan cu a haci mi creacion nan briya riba pasarela. Esaki ta solamente e comienso!”

   Publico di Glitz, Glam & Glow a duna un gran aplauso pa e creatividad y pasion di “Hermosa en Rosa,” reconociendo esaki como un di e momentonan sobresaliente di e show y un prome paso prometedo pa un diseñado hoben cu un futuro briyante.