Aruba a conkista titulo maximo di certamen Nuestra Belleza Internacional 2025 na Punta Cana

Bon trabao di Tara van der Werk y Elise Heronimo

ORANJESTAD (AAN): Den fin di siman a tuma lugar e di seis edicion di e certamen ‘Nuestra Belleza Internacional 2025’ na ciudad di Punta Cana, na Republica Dominicana.

   E aña aki, Aruba a wordo representa door di Tara van der Werk, y tambe Elise Heronimo, Miss Teen y Little Miss respectivamente.

   E candidatanan aki a wordo escogi pa GLW Foundation di e conocido George Winterdaal, pa bay competi pa e titulo maximo.

   Pa como un siman largo nan a keda na e pais, pa asina participa den diferente training y actividad.  Y durante e certamen, Aruba a demostra cu e ta sigui di ta un powerhouse den certamen.

   E hoben spierto y bunita, Elise Heronimo a sali di cuater finalista di Little Nuestra Belleza Internacional.

   E dama hoben Tara van der Werk a bay cu e titulo maximo, pues a keda eligi como Teen Nuestra Belleza Internacional 2025.

   DIARIO ta manda felicitacion pa GLW Foundation di Aruba cu a participa cu dos candidata fuerte na e certamen aki na Republica Dominicana.  Aki por mira Tara cu su trahe di gala, trahe nacional, y trahe di baño.