Conferencia di Clima na Aruba na un momento crucial
*Analisis di un planeta mas calor den temporada di horcan
*Laman cayente ta kibra record y causa problema serio
ORANJESTAD(AAN)—Kico ta calor, ta wordo experencia na 2023 cu un April, cu a produci tanto calor cu bida y salud di hopi hende a wordo efecta na forma directo of indirecto.
Porta pa e futuro cu lo crea condicionnan di tempo sumamente serio, ya a habri y mundo a drenta condicionnan di tempo, cu claramente ta produci mas desaster.
E grado di calor cu hende ta sinti, ta sumamente halto. Hasta e temperatura di laman a kibra record y ta duna tur motibo pa aplaudi cu na Mei Aruba lo saluda participantenan na e Congreso di Clima, cu Aruba hunto cu Hulanda ta tene na un momento culminante pa e peliger di un mundo mas calor pero tambe den porta di e temporada di horcan 2023.
Na Mei, National Hurricane Center di Merca, cu ta dirigi informacion y accion den temoirada di horcan, lo emiti su pronostico di e cantidad di horcan cu por spera durante e temporada di 2023, cu ta cuminsa dia Prome di Juni.
Otro instancianan ta sugeri cu por spera 13 sistema tropical cu por sigui desaroya durante 2023. Di e total aki, 6, pues casi mitar por bira tormenta tropical y dos por bira horcan destructor.
E pronostico pa 2023 ta haci hende regresa na 2022, ora un situacion di preocupacion a presenta su mes.
Na 2022, e cantidad mas abou di sistema tropical for di 2015 a worde registra den e region di Caribe y Golfo di Mexico y costa Atlantico di Merca.
Sinembargo, e dos orcannan Arlene y Bret a laga un saldo desastroso atras. Asina nan a duna prueba cu no ta e cantidad di horcan of otro sistema tropical mester tene na cuenta pa asesora e peliger cu e temporada ta trece, pero e condicionnan di tempo cu por spera y cu por destrui paisnan y sigur islanan.
Esaki ta hiba nos directamente na e punto central di nos analisis di awe, cu ta e Conferencia di Clima cu Aruba ta tene, y e necesidad pa atende cu cambio di clima cu impacto enorme di laman.
Den esaki mester comprende cu e Orecano no solamente ta produci cuminda pa hende, pero tambe ta e centro di energia, e centro di calor, cu ta alimenta tormentanan tropical cu ta bira destructor pa hende y tur loke ta parti di naturalesa y loke hende mes a crea of produci.
Na e momentonan aki, e preocupacion grandi ta, e temperatura di laman cu lo bira mas y mas peligroso y na 2024 por bira un preocupacion serio.
E temperatura halto di laman actualmente a kibra record tanto pa e temperatura cu laman a alcansa como e tempo cortico den cual esaki a socede.
Ciencia ainda no por duna un motibo pa e situacion actual pero si por adverti cu 2023 lo bira Aña di regreso di El Niño cu ta percura pa Oceano keinta y asina produci mas peligro di horcan na 2024.
E nomber ta representa tempo di Pasco na e costa Pacifico di America del Sur. Laman lo bira mas cayente loke lo afecta bida di organismonan den laman, produci awa mas cayente y asina mas chens pa condicionnan peligroso di tempo.
Laman lo conoce un nivel mas halto y absorbe menos gas peligroso, loke ta nifica temperatura mas calor.
E momento cu otro siman, Aruba lo tene e Conferencia di Clima, islanan chikito den Caribe incluso Aruba, ta papia di un menasa enorme pa hende y comunidad a base di peliger di horcan.
Teniendo cuenta cu e realidad cu ya ta haci tera y lama sumamente calor, Pueblo di Aruba mester uza e ocasion pa sostene e medidanan cu Gobierno di Aruba, mescos cu tur otro participante na e congreso, mester tume pa scapa bida y propiedad den e futuro cu ya a cuminsa.
DIARIO, cu durante basta tempo ta prepara Aruba pa e condicionnan di tempo cu lo efecta economia pero tambe bida di hende, lo ta cu Aruba pa asina prepara pa cambionan grandi na caminda pero tambe pa e peligernan enorme di temporada di horcan.
National Hurricane Center di Merca, ya a auncia cu su cantidad di boletinnan lo aumenta y cu lo presenta pronosticonan di siette enbez di cinco dia. Esaki lo duna mas tempo pa hende na peliger por prepara no solamente pa mas sistema di horcan na 2023 pero tambe pa cambio di tempo y clima, cu ta menasa humanidad.
Conclusion di tur informacion cu nos a sigui studia y analisa: tin motibo grandi pa prepara pa confronta e menasa di clima!
