Tur autobus mester core cu 11 asiento mas 1: esun di e chauffeur:
ORANJESTAD (AAN) – Minister di Transporte, Naturaleza, Integridad y Asunto di Adulto Mayor, den entrevista cu DIARIO a splica cu tur chauffeur di autobus a wordo invita na e reunion cu, recientemente, el a organiza pa sinta cu e gremio aki.
Lamentablemente no tur chauffeur a presenta aunke e mandatario a pasa den un trayectoria cu nan varios biaha na mesa. Prome tabata e aumento di e tarifa cu un florin, cu nan tabata desea, pero tambe cambionan cu nan tabata kier haci pa wak con nan ta opera.
E mandatario a bisa cu tin un total di 165 vergunning otorga pa core autobus, pero no ta tur ta opera activamente. Arends a indica cu mester bin cambionan cu a cuminza caba den e reunion cu a tuma lugar, den cual el a splica nan cu pa loke ta e vestuario ta bay bin un codigo cu nan mester atene na dje, y nan tabata positivo al respecto.
E minister a agrega cu tabata tin un discusion entre a chauffeurnan di autobus mes, bao e vergunning houders, cu ta e asunto di asiento. El a menciona cu tin autobusnan cu a wordo cumpra cu un total di 15 asiento, siendo cu e ley ta stipula cu ta 11 plus 1. Kiermen 11 asiento pa pasahero y esun di e conductor. Esaki ta vigente pa añanan caba pero a laga nan opera sin tin e control debido, y a palabra cu nan cu aworaki nan tin te 1 di October pa saca e asientonan adicional cu nan tin. Desde 1 di October DTP ta bay controla esaki, y manera manehonan cu tabata tin den pasado “tres strikes bo ta out”. Asina e dignatario a expresa.
“DTP ta bay haci controlnan severo, pa asina tur hende cu tin un vergunning tin un ley cu tin cu cumpli cune, y nos ta bay zorg pa e ley wordo reforza, y esey ta bay crea tambe un ‘level plain field’ pa tur hende”, Minister Arends a subraya.
No ta asina cu un bus ta bay core cu 15 asiento y otro cu 11. Esaki ta bay crea stabilidad den e sector aki, y ta di spera cu esaki por regula con e autobusnan ta regula.
“Nos a palabra tambe cu ta bay bin mas cambio. E beleid mes pa transporte publico den su totalidad nos ta premira cu lo keda cla meymey di September, y esey tambe ta e caminda unda ta bay bin mas cambionan adicional pa e autobusnan tambe”, Minister Arends a señala.
