Reaccion di Tienda di Educacion:
ORANJESTAD (AAN): United Nations a proclama den un asamblea general na 1993 cu dia 15 mei ta worde cataloga como dia internacional di famia. E meta principal pa conmemora e fecha aki ta pa conscientisa comunidad di e importancia y balor di un famia, tambe pa pone atencion na e retonan cu tin impacto ariba famia mundialmente.
Famia~ E pilar di un comunidad: Pa un persona por funciona debidamente den un comunidad e mester di personanan den su cercania cu por crea un ambiente di sosten y apoyo den su bida diario. Cu otro palabra un pilar cu ta brinda structura y siguridad basa riba amor incondicional. Nan ta e personanan cu lo wak bo potencial y laga bo mira e miho di bo mes como persona.
Den mayoria caso ta trata di un pareha y yiunan of un familiar. Tin varios dicho cu ta bisa cu tras di cada persona excitoso tin un hende cu ta para su tras pa apoy’e. Famia tin un rol masha importante pa cada ciudadano den nos cominidad, como cu e ta reenforsa individuonan pa carga e tarea di hiba su mes, su famia y nos cumindad dilanti.
Dia pa celebra hunto cu famia: Ta importante pa pone atencion na e balor agrega di ta forma parti di un famia. Disfruta di otro su compania, atencion y sosten. Dia 15 mei tur aña ta worde celebra e dia di famia mundialmente, pero nos por dedica y celebra cada momento cu ta posibel, sin necesidad di warda riba e fecha oficial.
Tin diferente manera cu nos por pasa tempo hunto den famia por ehempel, hunga wega di mesa, domino of actividadnan recreaccional, manera probecha di naturalesa of bay haci ehercicio hunto. Si ta amante di pelicula por wak film hunto. Tur esakinan pa por reenforsa e laso y tambe pa crea memorianan cu un balor sentimental cu lo dura pa semper. Pabien na tur famia di Aruba cu e celebracion di dia internacional di famia di parti Fundacion Tienda di Educacion.
Tocante Fundacion Tienda di Educacion: Fundacion Tienda di Educacion a worde funda riba 18 mei 2012 y tin como meta pa yuda mayornan y educadornan na tal forma cu nan habilidad pa soluciona problema di educacion di nan yiu, ta mehora. Fundacion Tienda di Educacion ta situa den edificio di Centro Pa Hoben y Famia, Sabana Blanco 68-C. Horario di servicio ta di dialuna pa diabierna, 8:00 am te cu 6:00 pm. Pa contacto yama 161.
