Mal concepto creciente di papel di mama ta peligroso pa futuro
*Cifranan ta indica cu matrimonio ta tambalea como instituto
*Scrap tata como cabez di famia ta exigi mas adaptacion legal
ORANJESTAD (AAN) — Den un situacion di cambionan mundial grandi, un cantidad di pais mescos cu Aruba lo celebra Dia di Mama.
Un celebracion cu na 2023 sigur ta urgi mundo pa atende, cu factornan directamente asocia na e palabra “mama” cu resultadonan enorme pa contenido y calidad di bida di hende.
DIARIO hunto cu expertonan a indaga den desaroyonan cu directamente ta mishi cu e papel di mama y cu ta bini directamente dilanti den e celebracion di Dia di Mama na Aruba.
Na 1905 un Merca, un persona a dicidi pa honra e papel di Mama. Su esfuersonan a culmina ora den seno di un misa, a celebra Dia di Mama.
E idea a capta atencion di medionan di comunicacion y asina Dia di Mama a cuminsa desaroya como un dia pa celebra e papel di Mama na Merca y otro paisnan cu a sigui e ehempel aki.
E motibo di celebracion di Dia di Mama ta pues mara na e forma cu cu un persona ta duna contenido na e responsabilidad cu ta mara na maternidad, sea na forma biologico of pa medio di adoptacion oficial of no oficial.
Cambionan cu a tuma lugar rond mundo den transcurso di tempo, a trece cambio grandi den e percepcion mama y tata, cu ta e base natural pa creacion di un famia, cu ta e comunidad mas chikito na mundo, loke ta nifica cu e ta mara na regla, comportacion, compartimento di responsabilidad na bienestar di tur hende envolvi y sigur e muchanan.
Mundo a cambia riba su mes pero a cambia tambe e reglanan basico di un famia, cu tabata reparti e responsabilidadnan di tata, mama y hasta e famia extendi manera padushi, madushi, omo y tanta.
Leynan tabata ocupa nan mes na forma severo cu responsabilidad di estado enfrente sigur menornan di edad, cu por tabata peliger.
Cambio serio a surgi den e patronchi di famia, manera expertonan a mustra DIARIO.
Nan a presenta cifranan concreto cu ta indica cu segun Censo 2020, un total di 22.830 ciudadano na Aruba tabata entre 0 y 17 aña di edad.
Di e total aki, 44 porciento, pues un minoria tabata biba den un relacion a base di matrimonio. Den relacion di pareha pafo di matrimonio 19 porciento ta desaroya. 30 porciento di mucha ta depende di un mama soltero.
Tres porciento di mucha ta depende di un tata soltero mientras cu 3 porciento no ta parce cu nan ta depende di un hende.
Informantenan ta mustra riba e cambio cu tin den e comunidad pa loke ta trata cambio cu tin den e comunidad, den cual mester tene na consideracion cu hopi mucha ta biba den un sistema cu nan tin dos tata y dos mama, pa motibo di divorcio y ta biba a base di dos situacion familiar cu por ta hasta contradici otro riba terenonan importante manera conducta social y moral.
Den pasado e papel di tata tabata asina importante cu mundialmente tabata tuma e posicion di tata den un famia, como indicacion pa un conducta aceptabel pa un comunidad.
Esaki a conoce cambio, mescos hopi otro aspecto cu ta haci cu oficialmente mester pone e responsabilidad di mama na disputa nobo pa asina dicidi pa e mucha pero tambe pa comunidad, cu mester tin suficiente ley social pa atende cu tur loke bay robez.
“Mescos cu ta bisa cu comunidad mester paga pa tur loke bay malo den un famia of pa atende cu loke ta peligroso pa un mucha, e comunidad mester por presenta limitenan pa conducta pa evita cu e mucha ta bira victima di mal mama den un situacion cu comunidad mester scapa,”informantenan a indica.
Informantenan experto a mustra cu segun cifra di 2020, 21 porciento di comunidad tabata entre 0-17 aña loke ta nifica cu 21 porciento di comunidad ta nace den un situacion den cual maternidad y paternidad a bira asunto sumamente discutibel, loke ta nifica mas y mas famia cu no a nace for di un union matrimonial.
Na e mes momento mundo ta cambia di exigencianan di loke ta famia y mara na famia, loke ta nifica cu casi un cuarto di poblacion di Aruba, e generacion nobo di e pais, ta crece cu un concepto completamente nobo di maternidad, responsabilidad di maternidad.
Esaki lo tin resultado pisa pa futuro di e pais caminda gobernacion democratico mester percura na prome lugar pa e bienestar material y no material di e ser humano incluso mucha.
Segun informantenan, uno di e tareanan grandi di Parlamento como instancia legislativo ta, pa entama estudio entorno balornan di maternidad, cambio den normanan y balor, e resultadonan pa comunidad cu cada generacion ta adapta.
DIARIO lo sigui indaga y informa riba e topico aki.
