Multitud di hende pa admira e pagara di 6 miyon dilanti Renaissance

ORANJESTAD (AAN): Multitud inmenso a acudi Diasabra merdia den area di Lloyd G. Smith Boulevard pa mira e fenomenal tiro di e pagara di mas grandi di Aruba, esta esun di

Renaissance.

   Semper ta cende e pagara aki for di banda di Renaissance Marketplace, y ta lage core bay pabao.  Pa final di 2022, a dicidi na cende esaki dilanti Crystal Casino, y lage core bay pariba y finaliza na Renaissance Marketplace.

   Gerente general di Renaissance, esta Paul Gielen, a indica cu e atardi ey tabatin presentacion musical di Robert Jeand’or na Renaissance Marketplace, y pesey a opta pa finaliza e tiramento aki eybanda.

   E pagara mes ta uno di 6 miyon tiro, y pa evita cu awacero lo basha net e ora ey, a haci uso di conseho di algun Piscador kendenan conoce e tipo di nubianan aki, y por duna un pronostico hopi detaya ki ora tin yobida of no.

   Originalmente a planea pa tira esaki 1:00 pm, sinembargo debi na yobida a hala esaki pa 1:30 pm.  Pasobra ta dura 20 minuut pa habri e pagara, y e ora ta busca forma pa cende mesora asina cu haya un bentana di oportunidad sin awacero.

   Aña 2022 a cuminza tiki slow e prome lunanan debi cu tabatin e preocupacion rond di e variante di Omicron.  Pero despues di esey, tur cos a tuma un rumbo pa positivismo y Renaissance y su Casinonan a draai bon.  Pesey mes, porfin despues di 3 aña por a pone bek e pagara aki atrobe riba caya.

   Paul Gielen a indica cu turismo pa 2023 ta mustra bon, y e deseo di hopi hende rond mundo ta pa bolbe viaha y goza di vacacion.  Aunke e ta basta preocupa cu loke a pasa siman pasa cu turistanan Canades den e parkinglot di Werfstraat na Playa (banda di Waf), ora cu tres anti-social a bati y causa trauma enorme na cara y curpa di e turistanan aki.  Gielen a indica cu mayoria turista ta bin Aruba pasobra nan ta sinti nan mes safe.

   “Loke a pasa cu e turistanan Canades tin nos preocupa, y nos ta spera cu comunidad no ta cambiando y bira manera otro destinacion den Caribe,” Gielen a bisa.  E ta adverti cu si cosnan asina sigui socede regularmente, lo bo haya turistanan cu lo opta pa busca otro destinacion turistico.

   E tiramento di pagara a bay bon!  Por a nota cu tabatin e momento ey 3 barco grandi di crusero den Waf, y hopi di e turistanan aki a acomoda nan mes den e area pa asina mira e tiramento di pagara aki.