MADRID: Muhernan cu no ta largo, awor lo por bay traha pa Cuerponan Policial na Spaña,
despues cu Corte Superior na e pais a indica cu e estatura minimo cu tabatin stipula pa un Polis femenino, tabata discriminatorio.
Corte a bari for di mesa e rekesito pa bo tin estatura di 1.60 meter minimo, door di tuma decision den un caso unda un dama hoben cu a wordo prohibi pa haci testnan di seleccion na aña 2017, como cu e tabata 4 centimeter mas chikito cu e minimo rekeri.
E rekesito aki “ta constitui un discriminacion indirecto contra muhernan compara cu homobernan di cual nan rekesito minimo di 1.65 meter ta mucho menos exigente, ya cu e porcentahe di muhernan (na Spaña) bao di e minimo aki (25%) ta mucho mas hopi cu e porcentahe di e hombernan (3%),” segun un documento di Corte.
Tanten cu e demandante ta pasa su examennan, Corte a ordena Cuerpo Policial pa contrata e muher y dune e mesun pago salarial retroactivo cu e muhernan cu a wordo admiti na 2017.
Segun un encuesta mundial haci pa Imperial College na London, e estatura promedio di un homber di 19 aña na Spaña ta di 1.76 meter na 2019. Muhernan di e mesun edad tabatin promedio di 1.62 meter. Hombernan di Spaña ta cay den e Top 58 mas halto compara cu 200 pais, mientras muhernan ta cay den e Top 77.
Hueznan a bisa cu Polis Nacional no a bin cu ningun hustificacion pakico ta limita acceso na trabao basa riba nan estatura. E proceso di seleccion pa bo bira un Polis ta envolvi testnan fisico y medico, cu ta garantiza cu e candidato ta suficiente den bon condicion pa cumpli cu e trabao, segun Corte.
