ATLANTA: Oficialnan di Centers for Disease Control and Prevention (CDC) di Merca,
a emiti e siman aki un alerta di salud pa Docternan, despues cu nan a descubri pa prome biaha riba teritorio Mericano, e bacteria cu ta causa un malesa raro y grave.
Debi cu a cuminza cu un investigacion pa cu dos caso di melioidosis humano, a detecta e bacteria Burkholderia pseudomallei (B. pseudomallei) den muestra di suelo y awa di algun dam den e region di Costa di Golfo den parti zuid di estado di Mississippi.
E dos hendenan contagia, cu no ta famia di otro, ta biba hopi cerca geograficamente y nan a contagia cu dos aña di diferencia, na 2020 y 2022, cu a pone autoridadnan di salud investiga tur producto cu tin den nan cas, y e area rond di nan hogar.
E malesa di melioidosis ta ocasiona keintura, dolor di joint, y dolor di cabez, como tambe pulmonia, formamento di abscess, y infeccion di sanger.
Na Merca, un promedio di 12 caso di esaki ta presenta cada aña, y mayoria di nan ta relaciona cu recien viahe na regionnan tropical y sub-tropical, unda e bacteria ta endemico.
Un grupo di 2021 cu a inclui cuatro persona di 4 estado, y cu a keda contagia, tabata relaciona cu un spray di aromaterapia contamina, cu a wordo importa na Merca.
Mayoria di hende sano cu ta drenta den contacto cu e bacteria, no ta desaroya e malesa di melioidosis.
