FRANKFURT: E director di Frankfurt Airport na Alemania, awor ta tira tur culpa riba e caos cu valiesnan na Aeropuertonan di Europa, riba maletanan preto.
Stefan Schulte ta conseha pa pasaheronan pone lo mas hopi posible den nan Carry-On, y si ta posible viaha cu esey so. Si acaso bo tin di usa maleta toch, e ora busca esnan cu ta facil pa mira di leu. Maletanan color preto ta asina comun, y pesey ta dificil pa distingui nan for di otro.
“Hopi hende ta viaha cu maleta preto riba wiel, y esaki ta ponebo perde hopi tempo tratando di haya nan,” ta loke e vocero di Frankfurt Airport, esta Thomas Kirner tambe a agrega.
Durante e pandemia, Frankfurt Airport a retira como 4.000 trahador, y awor ta tratando na sobrevivi cu e aumento drastico den demanda di pasaheronan awor cu medidanan rond mundo a desaparece. Nan a logra di haya solamente 1.000 trahador nobo pa traha riba maleta y despacha avionnan.
Debi na scarcedad di empleado, interupcion na Frankfurt Airport lo bay persisti pa e siguiente dos pa tres luna.
Te cu siman pasa, tin como 2.000 maleta pega na Frankfurt Airport y no tin forma ainda pa resolve e problema aki.
E sector di aviacion ta pasando den e dolor di cabez mas grandi e verano aki, cu retrazo di vuelo, maletanan perdi, y caos den tur skina di e industria, principalmente na Europa. Tur hende den e industria ta tira culpa riba otro pa e caos. Y awor ta mira cu hasta maleta preto ta hayando e culpa.
Mihor sugerencia: Si bo ta viahando e temporada aki na un vuelo cu ta haci un escala un caminda, mihor bo bay cu un Carry-On. Pasobra e chens ta grandi cu bo maleta nunca lo yega na e destino final, y lo bo no sa unda e ta tampoco.
