Hulanda a firma acuerdo di cooperacion cu Fundacion Telefon pa Hubentud Aruba

ORANJESTAD (AAN):  E Secretario di Estado di ‘Volksgezondheid, Welzijn en Sport’ di Hulanda, Maarten van Ooijen, a firma un acuerdo di cooperacion cu Fundacion Telefon pa Hubentud Aruba,

pa asina Fundacion Telefon pa Hubentud Aruba amplia nan servicio di ayudo telefonico pa mucha y hoben pa e islanan di St. Eustatius, Saba y Bonaire. 

            Desde 16 di maart caba e muchanan y hobenan di St. Eustatius por yama 918 Guana Chat na St. Eustatius y ricibi  oido, informacion, guia y conseho for di e mentornan di Telefon pa Hubentud Aruba. For di 27 di juni e muchanan y hobennan di e isla di Saba tambe por haci uzo di e servicio aki y Bonaire lo sigui mas despues e aña aki. Via di e 918 e muchanan y hobenan di Caribe Hulandes por ricibi tur dia di 2:00 te cu 6:00 di atardi ayudo gratis y anonimo for di Telefon pa Hubentud Aruba.

            Pa mas di 22 aña caba Fundacion Telefon pa Hubentud Aruba ta dunando oido, informacion, guia y conseho na e muchanan y hobenan di Aruba via di internet y/of telefon. E ayudo na e muchanan y Hobennan di e islanan St. Eustatius, Saba y Bonaire ta den cuadro di e ‘kenniscentrum’ di Fundacion Telefon pa Hubentud Aruba cu ta exportando conocimiento. Como un ‘Kenniscentrum’ Fundacion Telefon pa Hubentud Aruba ta exportanando conocimiento na organisacionan gubernamental y no-gubernamental den region. Banda di crea conocimiento y comparti conocimiento, awor Fundacion Telefon pa Hubentud Aruba como un ‘Kenniscentrum’ ta bay sigui exporta conocimento.

            E ampliacion di e servicionan di Fundacion Telefon pa Hubentud Aruba na e islanan di Caribe Hulandes ta un desaroyo hopi importante pa e muchanan y hobennan di e islanan  di Caribe Hulandes. James Sneek: ‘ E ayudo telefonico pa mucha y hoben ta pa tur mucha y hoben cu tin mester di un persona pa scucha nan’. ‘E mucha y hoben por papia di tur cos’.’ Semper e mucha of hoben por pidi ayudo y por conta semper locaul ta molestie’.

            Ministerio di ‘Volksgezondheid, Welzijn en Sport’ ta responsabel pa material den cuadro di comunicacion, manera e website www.guanachat918.com y material di promocion. Secretario di sstado van Ooijen: ‘Ta bon mes cu tin un linea telefonico di ayudo pa mucha y hoben’. ‘Ta importante cu muchanan y hobenan por tin un caminda pa comunica na momento cu nan tin preocupacion of pregunta’. ‘Un persona pa scucha nan caba por haci un diferencia grandi den nan bida’. ‘Mi ta spera cu esaki por stimula e muchanan y hobenan pa papia tocante cosnan cu ta strobanan den nan desaroyo’. ‘Cu servicionan accesibel manera esaki, nos kier contribui na un estado mental saludabel di e muchanan y hobenan di Reino Hulandes completo’.

            Pa mas informacion tocante di e servicio cu Fundacion Telefon pa Hubentud Aruba ta dunando na e muchanan/ hobenan di St. Eustatius y Saba por tuma contacto cu Fundacion Telefon pa Hubentud Aruba.