Muher a wordo opera di urgencia debi na un tumor di 46 kilo

Caso asombroso na Brasil

RIO DE JANEIRO: Un muher brasileño di 45 aña di edad, kende tin un estatura di 1.52 meter, y tin 150 kilo di peso, a wordo hospitaliza algun siman pasa pasobra e tabatin dolor constant di cabez, y ta haya sensacion tin biaha cu e no por hala rosea bon.  Ademas parti di su barica tabatin algo cu ta bin afo y ta colga di banda.

   Docternan a haci un serie di test, y a base di e X-Ray a bin descubri cu e tin un tumor impresionante di 46 kilo.  Casi 1/3 di e peso di pashent.

   Asina a bin haya sa, cu e muher ta bibando cu e tumor aki pa como cinco aña caba.  A core tene un conferencia cu demas ciruhanonan pa asina traha riba un plan di atake pa operacion urgente.

   Siman pasa Diaranson porfin via un operacion di urgencia, Docternan a saca e tumor for di su curpa.  E cirugia a socede na Sao Jose do Avai Hospital na Rio de Janeiro, a dura dos ora, y un team di 14 Docter Ciruhano a forma parti di e operacion.

   Henter e Hospital a mobiliza pa haci e operacion grandi aki riba e pashent.

   “E tabata e tumor mas grandi cu mi a yega di opera, y sin duda un di esnan mas grandi cu un hende a yega di opera,” ta loke Docter Gláucio Boechat a bisa, kende ta e ciruhano cu a lidera e operacion.  E tin mas di 20 aña di experiencia como ciruhano.

   E cirugia tabata un exito, y algun ora mas despues ya e pashent tabata stabil y por a cuminza come bek atrobe.

   Docternan ta sospecha cu e tumor grandi aki a origina den su uterus, pero nan tin di warda 3 siman pa resultado di biopsia pa haya sa mas di esey, e.o. si acaso e tabata canceroso of no.  E pashent ta keto bay hospitaliza pero ta recuperando bon.

   E costo di e cirugia a wordo cubri pa e facilidad medico, y e sistema publico di salud di Brasil.

   E potretnan aki pa cortesia di Dr. Gláucio Boechat.