Muchanan di Sisters Summer Camp Aruba a haya hopi informacion valioso riba tema di termento

ORANJESTAD (AAN):  Daniela Pop, organizador di 'Sisters Summer Camp' a splica cu el a bin cu e idea di organiza un camp durante pandemia di COVID-19 na 2020

cu ta enfoca pa yuda mucha muher traha riba nan amor propio y confianza den nan mes, como tambe demostra nan talentonan. Un total di 15 mucha a participa e aña aki.

Esaki ta di dos biaha cu e ta organiza e camp, pa motibo di su estudio den exterior, Pop a indica cu el a bin pasa su vakantie na Aruba y asina sigui cu e camp.  Como cu den pasado Pop a yega di traha cu Telefon pa Hubentud, el a acerca Shurman Milliard pa papia riba tema di 'bullying'. Nan a organiza varios actividad pa e muchanan, manera traha posters y wak un video.

Shurman Milliard di Fundacion Telefon pa Hubentud a bisa cu como organizacion  ta hopi importante pa participa den e diferente summer camps, pasobra esnan cu ta traha cu hoben y mucha mester tin hopi curason y afinidad pa traha cu nan.

Miliard a indica cu na momento cu nan a worde acerca pa duna un mas informacion tocante di bullying, nan a haya esey hopi importante. El a bisa cu naturalmente e ta leuk pa laga e muchanan bin hunto, pero tambe bo mester laga e muchanan haya e oportunidad pa siña algo y termento ta un topico hopi importante. E biaha aki, hunto cu Daniela Pop y Sisters Summer Camp, nan a haya un oportunidad pa duna informacion riba e tema aki y e muchanan mes a wak un pelicula cortico tocante di termento, cu ta disponibel riba nan website y riba YouTube.

Milliard ta kere cu e trabao conhunto tabata tremendo, no solamente cu e grupo aki, pero otro summer camps cu tambe Telefon pa Hubentud ta apoya y ta stimula pa asina e hobennan haya mas beneficio den e temporada di vakantie aki tambe.