PORT OF SPAIN: Un grupo di 70 venezolano cu ta deteni na e Heliport di Chaguaramas na Trinidad & Tobago,
awor ta lantando nan voz y ta exigi pa nan wordo poni den libertad, como cu ya caba nan tin mas di 1 luna cera eyden sin cu nan a comete un delito.
E venezolanonan aki a wordo gara door di autoridad den un Bar na St. James dia 9 di Juli 2023.
Nan abogadonan tambe ta adverti, cu debi na e detencion ilegal di nan clientenan durante 15 dia, prome cu e Heliport aki a wordo designa como centro di detencion di Inmigrantenan, e 70 venezolanonan aki lo haya derecho pa denuncia daño y perhuicio.
Den un carta di protocol di accion cu abogadonan a manda Dialuna siman pasa na Ministro di Seguridad Nacional, Fitzgerald Hinds, e abogadonan ta exigi libertad di e 70 migrantenan, of pa nan wordo poni bao supervision, sperando riba nan peticion na Agencia di Nacionnan Uni pa Refugiadonan (UNHCR). Abogadonan a pidi Ministro pa no deporta e grupo te ora cu nan haya sa e status di refugiado cu UNHCR. Nan kier wak e informacion cu Ministro a haya, ora el a emiti ordo di deportacion pa e grupo dia 24 di Juli.
E abogadonan tambe a pidi Ministro Hinds pa corda riba e regla cu nan a introduci na 2014 riba proteccion di refugiadonan, of bisa nan si acaso e politica aki a wordo revoca.
Nan kier pa Ministro duna copia di un rapport di investigacion riba un dama deteni kende a denuncia cu el a wordo abusa sexualmente tambe eyden.
