Muchanan di Scol Preparatorio ya caba pensando riba futuro profesion

ORANJESTAD (AAN): Nunca ta demasiado trempan pa cunminza pensa kico lo bira e futuro profesion di muchanan chikito.

  Y pa haci esaki mas interesante, docentenan di e Kleuterschool na Colegio Conrado Coronel a dicidi na haci esaki na un forma interactivo y interesante.

   Riba Diabierna nan a clausura e tema “Profesion” cu e muchanan di kleuter.  Nan a concentra den overdekte speelplaats, y nan tabatin e conocido Jean Carlo Espinal como presentador.

   E mainta aki, nan tabatin presentacion di Lyanne Kock cu a duna presentacion di fitness, y a pone muchanan rek curpa un rato pa nan curpa ta mas flexible.

   Tambe tabatin Reggie y Melitza Bermudez di Aruba Salsa como bailarin/bailarina cu laga e muchanan marca poco paso.

   Na final un Bombero tambe a pasa bishita nan y duna un presentacion.  Muchanan a keda contento, y docentenan satisfecho cu e contribucion di cada invitadonan.  Sigur e mainta aki, e muchanan di Colegio Conrado Coronel a siña un poco mas.