Muchanan di Mari Goretti College y Ayo Kleuterschool a goza di actividad pa Dia Internacional di Mucha

ORANJESTAD (AAN): Den fin di siman rond Aruba tur caminda tabata tin diferente actividad, relaciona cu Dia Internacional di Mucha cu tabata 20 di November.

Asina Maria Goretti College y Ayo Kleuterschool a organiza un dia special pa e muchanan Diasabra.

Den un entrevista cu DIARIO cabesante di e scolnan Mirla de Cuba Tromp a splica cu e actividad cu a wordo organiza tabata den forma di un feria.

“E muchanan a logra participa na diferente actividad”.

Nos tabata tin un team di scol, un comision special cu a traha riba esaki, pero nos tur como colega a duna nos input den esaki.

E muchanan a bin y completamente gratis nan a pasa hopi dushi di 9’or di mainta te cu 12or di merdia, segun de Cuba, kende a splica cu e muchanan a hunga entre otro weganan tradicional manera rancamento di cabuya (‘touwtje trekken’) y otro weganan popular.

E cabesante a splica cu ta bay tin mas actividad na caminda pa e muchanan, den e lunanan cu ta bin.

El a splica cu e y su coleganan ta bezig cu entre otro un bunita actividad pa e muchanan pa Pasco, pero e detayenan ainda ta un secreto.