Deaxo Croes a logra hazana historico di landa entre Bonaire y Corsou

Pa un bon causa!

ORANJESTAD (AAN):  E landado arubiano Deaxo Croes a logra exitosamente e hazana historico di landa un total di 53 kilometer entre e lama di Bonaire y Corsou.

            Deaxo a inicia su trayectoria diasabra madruga na Bonaire y el a yega Corsow banda di 5or , manera a wordo pronostica.

            El a wordo acompaña pa su team di 'Crossing for Prevention', cual ta un evento crea cu e meta di concientisa comunidad riba e malesa di cancer y recauda fondonan pa tres institucion di e islanan ABC: CORESA Foundation Aruba, Caribbean Prevention Center Curaçao y Kanker Fonds Bonaire.

                        Su team, conforma pa famia, doctor, coachnan, entre otro,  a dun'e tur sosten pa asina e por a logra realiza cu exito y di un forma safe e trayecto aki cu sigur tabata uno basta duro.

            Mester menciona cu e logro aki ta sosode 4 aña despues di 'Crossing for Hope', cual tabata un otro reto di Deaxo ora cu a landa for di e costa di Venezuela pa Aruba. E biaha ey a recauda un total di 123 mil Florin pa Koningin Wilhelmina Kanker Fonds.

            Deaxo a yega Corsou den bon estado unda el a wordo ricibi pa su tata Tico Croes, su mama Tita Iglesias y henter team. E tabata basta cansa pero emociona di por a finalisa e hazana aki cu ta convirti'e e prome persona den Reino Hulandes cu a landa entre e isla di Bonaire y Corsou.