ORANJESTAD (AAN): Den cuadro di e Dia Mundial di Diabetes (14 di november), Aruba One Happy Island Lions Club,
den colaboracion cu POH (Praktijkondersteuners Huisartsenzorg), a brinda diahuebs mainta un charla educativo y interactivo na klas 4 y 5 di Colegio Santa Famia na Pos Chiquito.
E actividad educativo tabata dirigi na studiante-nan di enseñanza primario, cu e meta pa: (*) Aumenta conocemento basico riba diabetes. (*) Splica e diferencia entre diabetes tipo 1 y tipo 2. (*) Enfatiza importancia di estilo di bida saludabel. (*) Motiva muchanan pa tuma decision cu por preveni diabetes tipo 2.
Durante e sesion, e presentacion a sigui e metodologia di IDF KiDS, adapta pa scolnan, y tabata inclui un dinamico Kahoot educativo pa stimula participacion y comprension. Muchanan a participa cu entusiasmo y a mustra gran interes den e topico.
Na final e alumnonan a ricibi un appel cu e mensahe: “Bo mes tin di cuida bo curpa. Come mas fruta, bebe awa, y move bo curpa pa preveni diabetes”, y tambe un foyeto cu informacion tocante diabetese.
Aruba One Happy Island Lions Club ta expresa su profundo agradecimiento na e expertonan di POH, pa nan presentacion claro, accesibel y adapta na nivel di studiante, tambe Colegio Santa Famia, pa nan colaboracion y apertura, Hilton Aruba Hotel y Riu Hotel, pa nan apoyo y cooperacion, y tambe BID, pa nan contribucion y asistencia.
Aruba One Happy Island Lions Club ta reafirma su compromiso cu educacion, conscientizacion y prevencion den comunidad. Por medio di proyecto como e charla educativo aki, nos ta traha pa prepara un generacion cu tin mas conocemento riba riesgonan di diabetes y pa stimula un estilo di bida saludabel.
