Director señora Gianaika van der Biezen:
ORANJESTAD (AAN): Gianaika van der Biezen, Director di Fundacion pa Nos Comunidad (FPNC), den entrevista cu Matutino DIARIO a duna di conoce cu, durante e aña aki, FPNC tabata tin hopi cambio y tambe nan a ehecuta mas proyecto cu den e añanan anterior.
“Pero semper pa fin di aña nos tin retonan pasobra nos kier agrega mas producto e pakete cu nos ta entrega na famianan. Anto esey ta uno cu nos ta trahando cu ne aworaki, pa acerca comunidad y tambe comerciante, donantenan cu ta dispuesto na contribui, pa haci esaki posibel”, van der Biezen a relata.
E dama a agrega cu pa luna FPNC ta yudando 350 famia cu dependiendo di con grandi e constelacion ta, individual bo ta conta entre 900 cu 1000 famia, pero nos proyectonan a bay hopi bon e aña aki, cualnan ta: Back to school, Cumpleañero contento, cu ta haci cu por duna un aporte extra na e famianan cu tin e necesidad di e sosten aki; anto, esaki e aña aki, a bay hopi bon.
E famianan cu ta busca ayudo cerca e fundacion ta cambia. E idea ta cu nan ta yuda temporalmente, y otro famianan ta bin acerca, depende di e motibo cu nan tin pa pidi ayudo. “Nos ta yuda hendenan cu, por ehemplo, a perde un trabao, of cu na e momento ey tin un debe inespera cu a bin, of malesa a toca porta, dus, ta diferente motibo”, director di FPNC a splica.
El a agrega cu hopi biaha a traves di un trayecto di participacion of un plan cu ta traha pa e cliente, ta purba cu e persona aki no ta keda semper den e sistema di banco di alimento. Hunto cu otro colaboracion y otro organizacionnan nan ta purba di haci esaki posibel. “E diferencia ta cu ora nos tin algun adulto mayor cu ta den e sistema, nos no ta traha ningun plan pasobra ya nos sa cu esey ta bay keda nan entrada, temporalmente, anto esakinan ta esnan cu si ta keda den e sistema cu ta mas largo, pa haya ayudo”, Gianaika van der Biezen a señala.
