Muchanan awo por disfruta di dos mini turf na Oranjestad y San Nicolas

Minister Gerlien Croes:

ORANJESTAD (AAN): Den cuadro di Copa Mundial, Ministerio di Deporte, Minister sra. mr. Gerlien Croes, conhuntamente cu Lotto pa Deporte, a instala dos mini turf na diferente punto di Aruba pa asina biba e emocion di futbol mas cerca den nos comunidad.

Comunidad por disfruta di un mini turf na Plaza Daniel Leo na Oranjestad y  San Nicolas tambe por disfruta di un mini turf situa na Carnival Village, ambos lo permanece na e localidanan aki temporalmente. E iniciativa aki tin como meta pa stimula participacion deportivo y brinda nos muchanan y hobennan e oportunidad pa experimenta e energia di Copa Mundial di cerca.

Minister Gerlien Croes ta enfatisa importancia di iniciativa aki: “Copa Mundial ta un momento di unidad y inspiracion. Cu e mini turfnan aki, nos ta duna nos comunidad—y specialmente nos muchanan y hubentud—un espacio pa move, hunga y soña grandi pero tambe un momento pa discubri talento”.

Minister Gerlien Croes ta invita tur mayornan pa hiba nan muchanan pa haci uzo di e facilidadnan y ta haci un peticion na comunidad pa cuida y mantene esakinan, pa asina garantisa cu tur hende por sigui disfruta di nan.

“Laga e bala cuminsa lora!” ta e mensahe cu ta resona durante e temporada di Copa Mundial, cu Aruba ta celebra futbol den un manera activo, inclusivo y comunitario. Brindando apoyo na mes momento na nos isla ruman Corsou y madre patria Hulanda y otro paisnan cu ta den contienda pa bira campeon mundial di futbol den Copa Mundial 2026.