ORANJESTAD (AAN): Recientemente a tuma luga e clausura oficial di e Proyecto Wikipedia na Aruba cu un ultimo y
exitoso encuentro di Ban Wiki na Biblioteca Nacional-Departamento Arubiana Caribiana. Durante e actividad, participante y boluntarionan a sigui amplia nan conocemento tocante contribucion na Wikipedia, Wikimedia Commons y Wikidata, cu enfoke special riba documenta y comparti mas informacion tocante artistanan di Aruba.
E proyecto tabata bou coordinacion di Ginelly Quandt y Ricardo Arends, prome Wikimedian in Residence
na Aruba, kendenan a guia y facilita e diferente actividadnan durante e trayecto di e iniciativa.
Durante su discurso di clausura, Quant a expresa su satisfaccion cu e resultado di e proyecto y cu e manera cu boluntarionan a sigui desaroya nan habilidadnan pa contribui na plataformanan di conocemento liber.
Durante e proyecto a organisa varios actividad di Ban Wiki, brindando oportunidad pa boluntarionan siña y practica con pa crea, mehora y amplia contenido relaciona cu Aruba. Pocopoco, un comunidad local di contribuyente a cuminsa forma, cu ta representa un paso importante pa preserva y comparti nos herencia cultural, artistico y historico cu mundo henter.
“Wikipedia ta un plataforma cu ta wordo construi, maneha y manteni door di boluntarionan. Pa e motibo ey ta hopi importante cu e conocimento y material cu a wordo crea durante e proyecto keda den man di e comunidad pa sigui desaroya,” Quandt a señala.
Segun e Wikimedian in Residence, e proyecto no solamente a laga atras contenido nobo y valioso na Aruba, sino tambe un grupo di persona cu awor tin e conocemento basico pa sigui contribui activamente. El a anima tur participante pa continua aporta y amplia e informacion disponibel riba Wikipedia y e otro plataformanan Wikimedia.
Organisacionnan manera Biblioteca Nacional Aruba, hunto cu otro partner y colaborado, a desempeña un papel importante den e iniciativa. E colaboracion aki a pone na evidencia con coleccionnan y recursonan local por haya un lugar mas visibel y accesibel den plataformanan digital internacional.
Agradecimento special ta bay na tur boluntario, participante y partnernan cu a contribui na e proyecto. Cu e iniciativa aki, Aruba ta duna un paso importante den comparti su historia, cultura, arte y patrimonio cu un audiencia global.
