James Sneek, director di Fundacion Telefon pa Hubentud-131
ORANJESTAD (AAN): James Sneek, Director di Fundacion Telefon pa Hubentud (131), den entrevista cu Matutino DIARIO a expresa, cu nos no mester bay over na bisa e mucha kico p’e no haci, pero bis’e, splic’e y profila tambe, kico nos ta spera di dje.
“Pasobra si mi kier pa e mucha, e hoben na Aruba, cu ta cana den nos comunidad bisa ‘bon tardi, bon dia, ‘bon nochi’, ‘mi por yuda señora cu e saco pisa eynan’ mi tambe tin cu bay profila esaki. Nos mester ta un ehempel tambe, pasobra nos ta papiando, den e caso aki, sigur den e sector preventivo. E mester keda leu di loke ta curativo. Mester bay splica e mucha, e hoben aki, kico nos ta expect di dje, y no kico nos no kier di dje, anto esey ta un stap grandi cu nos tin cu haci, crea e confianza cerca e hoben, y e confianza aki bo ta bay crea door di tin un relacion cu ne: e relacion na cas, e relacion den cura di scol, e relacion na clubnan deportivo, y tambe riba caya, por ehempel”, James Sneek a relata.
Sneek a comenta cu e famianan awe no ta mescos cu e famianan di antes, y algo masha importante ta pa nos duna e mucha, e hoben, tempo. El a reitera algo primordial: “Confianza ta hunga un rol hopi importante. Nos tin cu bay over na huzga e mucha of e hoben pa loke el a haci? Of bay compronde di con el a hacie. Esaki kiermen ‘mi ta scucha bo; mi t’ey pa bo, mi tin oido pa bo. Mi no tin un reaccion di biaha riba bo, mi no ta di acuerdo cu bo conducta, pero ami como persona tey pa sostene bo. Esey mi tin cu bay over na bo, anto e ora ey bo ta bay wak cu e mucha/hoben ta bay tin mas confianza; nos ta ocupa reacciona en bez di scucha e mucha cu e hoben”, Sneek a señala.
Tur mucha, hoben mester siña con pa anda cu reto, pasobra reto ta parti di bida, ta fortalece bo, ta crea bo tambe como persona. Anto nos mester bay sostene e mucha cu e hoben pa enfrenta reto, segun James Sneek, director di 131.
