Señora Haydee Henriquez, Presidente:
ORANJESTAD (AAN): Koningin Wilhelmina Fonds Aruba (KWF) ta cla pa su siguiente evento cu lo tuma lugar dia 30 di november proximo. E evento ta den colaboracion cu Alhambra Casino cu e meta pa recuado fondo pa e fundacion sigui yuda comunidad di Aruba den e necesidad pa cu e malesa cancer. Señora Haydee Henriquez, Presidente di KWF ta splica di nan ultimo evento pa e aña aki, “Ride for the Roses 2025”.
Señora Henriquez ta splica cu “Ride for the Roses 2025” ta un caminata combina cu coremento na pia of biscicleta. Esaki ta un momento cu famianan por uni y participa riba un diadomingo mainta tempran mientras ta colabora na un bon causa. Lo tin ruta pa adulto y pa mucha dunando oportunidad pa tur cu kier, participa. Y na final, esnan cu ta den e necesidad pa haya un masashi di pia, señor Candito y su ekipo lo ta presente pa esaki.
Pa inscribi, por haci esaki dia 22 di November na e foodcourt di Alhambra Casino unda cu miembronan di WKF lo ta presente pa registracion. Tambe por registra y paga e suma di 25 florin online riba e website di Ride for the Roses Aruba. Participantenan por dorna nan tshirt tambe na honor di nan famia cu a y of ta luchando cu cancer.
“No tin limitacion di participacion. Caminda ta grandi y tin luga pa tur”, señora Henriquez a enfatisa. Diadomingo 30 di November, ya pa 7:or di mainta, lo start e “Ride for the Roses 2025” na e parking lot di Alhambra.
Den nomber di Koningin Wilhelmina Fonds Aruba, señora Henriquez ta gradici Alhambra Casino y e Pr Marketing, señora Anni Dirks pa e colaboracion di mas di 10 aña pa e bunita causa pa recauda fondo.
