Segun Erick Henriquez- Presidente di SIWA:
- Awo e ta riba mesa pa wak si por cambi’e bek na esun original
ORANJESTAD (AAN) – Erick Henriquez, Presidente di Sindicato SIWA, a trece dilanti den entrevista cu Matutino DIARIO, cu Aruba ta den cambio di gobernacion practicamente, y cu hopi contratempo, y mester ta realistico cu esaki.
Riba esaki, e problema De Meza riba mesa, el a expresa. Tambe tin e caso cu prome tabata Herde, awo ta Dowers, pues tin hopi reto.
“Ami ta fiel creyente cu tanten cu bo no tin tanto cambiamento y no tin garantia pa e shon cu ta sinta, esun cu ta sinta ta casi hacie como un side job. Aunke mi ta sigur cu Dowers ta purba haci su best, cu ta 100% dedica, esaki ta un tiki fastioso”, e lider sindical a comenta. El a agrega cu mirando e desaroyonan cu tin pa WEB, unda tin cambionan grandisimo den e planta tin un nobo cu ta biniendo pa produccion di awa pa Aruba, pero nan tin cu para keto y tene cuenta cu e trahadornan direct.
“Hopi biaha nos haci cosnan na banda, cu ta proyectonan, pero ki ora nos ta bay dedica na e trahadornan pasobra hopi biaha nan ta acusa nos di hopi cos cu ta molestia e pueblo; e trahadornan tambe ta hende. Nos tin cu para keto wak con structuralmente, nos ta trece esey pa pueblo compronde cu e situacion aki den no tur ora ta facil, e director tin retonan sin duda algun”, Henriquez a bisa.
El a agrega cu e director a perde monton di tempo na discuti politica, na lugar di discuti di cosnan den cas, por ehemplo den maneho, dedica na Aruba WEB NV mes su produccion y defende e trahadornan nan posicion.
El a bisa cu e ta spera cu nan haya trankilidad, t nester corda bon, di e anochi scur dia cu gobierno a cay, kiermen eleccion 2024 a pasa caba, e ora ey statuto a wordo cambia door di Gobierno anterior, loke e ta hay’e ta un falta di respet inmenso y no tin palabra pa discuti e asunto aki. El a reitera cu esaki a sosode sin papia cu pueblo di Aruba ni cu e trahadornan di e compania, y a reitera cu esaki ta un falta di respet.
“Danki Dios cu nan a haci’e ora cu eleccion a bin, pasobra si no, nos lo a welga. Pero si nos a welga e ora ey bo lo a hacie contra e gobierno actual, cu no tin nada di haber no tin arte ni parte den dje”, Erick Henriquez a remarca.
El a menciona cu e cambio ey ta na mesa cu Utilities Aruba NV nobo sinta na mesa, e ta spera cu por logra di cambia e statuto bek na su forma original.
