Emergencia medico den avion durante vuelo pa Aruba
ORANJESTAD (AAN): Diamars mainta, e buelo di Avianca procedente di Bogota, Colombia tabata iniciando su descenso pa asina aterisa na Aruba ora cu personal di tripulacion a haci un anuncio inespera puntrando urgentemente pa un dokter den e vuelo.
Mesora, esnan abordo a cuminsa wak yen movecion den avion y for di e parti patras di e avion un persona a cuminsa core bay na e parti dilanti cu un mucha chikito den brasa. Na mesun momento, un dokter a meld su mes, a pone su mes disponibel, a coloca e mucha homber riba vloer y a cuminsa dun’e prome auxilio.
Periodista di DIARIO cu tabata den e vuelo a relata e tension y e ansiedad cu e pasaheronan a cuminsa experimenta di por a mira con un emergencia medico a presenta cu un criatura di entre 8 pa 9 aña.
A dura mas o menos 30 minuut prome cu e avion por a aterisa y cu e dokter, cu ayudo di e tripulacion, a traha riba e mucha homber.
E capitan a haci su anuncio indicando cu tabatin un emergencia medico y pa tur hende coopera y sinta keto mientras cu e proceso di aterisahe por a tuma luga y bay over na atende prome cu e emergencia. Ya caba a bati alarma na aeropuerto pa asina activa e protocol den casonan asina.
Ora cu e avion a yega tera, na aeropuerto, ambulance a presenta y paramediconan a subi avion pa tuma over e mucha homber pa purba stabilis’e. A pon’e riba brandkart pa transport’e direccion hospital.
Pa esaki, polis a cera caminda pa e transporte por a bay mas lih’e. Mientrastanto, esnan den avion a keda den shock cu e incidente. Algo tambe tristo tabata di por a mira e tata y e ruman muhe di e mucha con afecta nan tabata cu loke a pasa.
Mester menciona cu esaki tabata un vuelo basta yen y a dura rond di un ora pa asina tur e pasaheronan por a baha for di avion.
DIARIO por a combersa cu e dokter cu a duna CPR na e mucha y aunke e no por a duna hopi detaye si el a indica cu e condicion di e criatura tabata basta critico. Banda di esaki, un otro pasahero cu tabata sinta cerca di e famia a comenta cu el a haya sa cu e mucha a bira malo na Argentina, unda e famia tabata cu vacacion. Parce cu e mucha lo a haya ‘food poisoning’. Na Bogotá, e mucha tabata saca. Ya den avion, el a bira mas malo y a sigui saca di mas te ora cu el a cay flauw.
Den oranan di atardi DIARIO a haya confirmacion cu e mucha homber local, di cual su identidad no ta conoci ainda, a fayece na Hospital aparentemente pa problema cu curason.
DIARIO kier a expresa palabranan di sincero y profundo condolencia na e famia y conocirnan. Hopi forsa na e momentonan dificil aki.
