E profesional medico cu a stima San Nicolas
ORANJESTAD (AAN): Tabata Diabierna dia 25 di Juli, pues hopi recien a drenta e noticia tristo, cu e conocido Docter di cas, Dr. Cyrill E. Zaandam a fayece na Hulanda despues di enfermedad di cancer di prostaat.
Dr. Zaandam tabata un conocido dokter cu henter su trayectoria como medico a traha na San Nicolas. Ya cu su 25 aña el a gradua como dokter di cas na Universiteit Utrecht y mesora a opta pa bin traha na su isla, hunto cu su casa dr. Mathilda Zaandam-Verhees (q.e.p.d.) na aña 1965.
Dr. Zaandam tabata conoci como un dokter di pueblo cu semper a traha bisti cu paña comun y no bisti cu e camisa special blanco di dokter.
Su ‘medische praktijk’ na San Nicolas a bira hopi conoci te cu na aña 1988 el a funda “Medische Praktijk C.E. Zaandam N.V.”, cu na e momento ey ya tabata trata como 5.000 pa 6.000 pashent.
Na aña 1970, Dr. Zaandam a funda ‘Famia Planea Aruba’, cual instituto ta cumpliendo 55 aña dedicando na Salud Sexual Integral y Reproductivo via di Educacion. Como medico, Dr. Zaandam a asisti na mas cu 3.000 parto na Aruba. Hopi Arubiano conoci a nace pa medio di su asistencia medico.
Riba empeño y iniciativa fuerte di Dr. Zaandam, na aña 1981 San Nicolas a haya su Centro Medico San Nicolas, cual awendia a cristalisa den Instituto Medico San Nicolas (ImSan).
Dr. Zaandam a forma parti di directiva di Fundacion Coopercacion Desaroyo San Nicolas funda na aña 1989, hunto cu personanan conosi den comunidad di Aruba.
Na aña 2005, despues di a traha 40 aña como medico na Aruba, dr. Cyrill Zaandam a baha cu pensioen y a bai establece na Hulanda, caminda su dos yiunan ta biba.
Diasabra awo dia 2 di Augustus 2025 na Loenen-Utrecht lo tuma lugar e acto di entierro di Dr. Cyrill Zaandam, kende a stima su isla, specialmente San Nicolas, masha hopi mes.
Na famianan di Dr. Zaandam, famia Mansur y DIARIO ta manda su mas profundo palabra di condolencia. Que en paz descanse.
E relato aki den colaboracion cu Frank E. Zaandam.
