mr. David G. Kock nombra como Presidente di Raad van Advies

ORANJESTAD (AAN): Pa medio di decreto nacional di 2 maart 2023 a wordo formalisa e nombramento di mr. David G. Kock como Presidente di Raad van Advies di Aruba entrante 1 januari 2023.

Mr. David Kock Kock no ta un persona desconoci na Aruba: e ta abogado di profesion, socio di bufete di abogado DK Legal, docente di derecho laboral na Universidad di Aruba y desde juli 2012 e ta fungi como un miembro balora di Raad van Advies.

            E tin un conocemento amplio y experiencia grandi riba diferente tereno di derecho. Raad van Advies y e Wetenschappelijk Bureau di Raad ta felicita mr. Kock cu su nombramento y ta contento di por continua e bon cooperacion cu mr. Kock.

            Tambe riba e mesun dia 1 di januari 2023 a drenta na vigor e ley nobo di Raad van Advies (Landsverordening Raad van Advies 2022). Cu esaki e posicion independiente y autonomo di Raad como e consehero constitucional mas halto di Gobierno y Parlamento a wordo fortifica mas ainda.

            Pa mas informacion riba e posicion di Raad den nan constelacion estatal, e composicion y tareanan di Raad y garantianan pa sigura e independencia di Raad, ta wordo referi na e website di Raad: www.rva.aw.