ORANJESTAD (AAN): Henter Aruba ta celebra Dia di Himno y Bandera y Scol di Arte tambe tin un evento cultural pa pasa bishita.
E evento aki ta cuminsa 1’or y ta caba 5’or. Kico tur lo por haci na Scol di Arte?
Open House y benta di artesania
Scol di Arte semanalmente tin diferente les pa diferente grupo meta. Den nan evento di 18 di maart lo tene un Open House pa e publico por conoce e lugar y haya sa kico tur ta ser brinda. Por papia cu e docentenan y lo tin oportunidad pa inscribi. Lo tin benta di arte y artesania di artista nan local, pasa aporta y yuda nos artista pa sigui crece den su arte.
Lo tin exposicion di escudo y bandera den sala grandi, aki publico por haya sa tiki mas di e nificacion di nos simbolo y colornan di e bandera.
Cushina lo ta den man di Sweet Infusion by Layla, pasa saborea bo pan cu sanger yena, sopi carni, Johnny cake cu bacalao y hopi mas. Sin laga afo e cos dushi manera cocada y pan boyo. Pasa y purb’e pa boso mes.
Baile y Canto
Durante e evento lo tin dos grupo di baile cual ta Dazzling Dancers y Gucci Dancers cu lo duna nan presentacion. Tambe cantantenan di festival Un canto pa Himno y Bandera di e grupo Rejoice lo canta nan bunita cancion nan. DJ Rasta Alvin ta esun encarga pa deleita e publico presente durante henter dia cu dushi musica.
Actividad pa famia
Loke no por falta ta un actividad pa henter famia, pasa y pinta bo banderin cual ta ser colga den e foyer di biaha pa un mini expo. E obra nan aki nos ta laga colga den foyer di Scol di Arte pa publico por wak e bunita creacion nan.
Durante dia tambe por saca potret hunto cu ful famia den e skina di cultura, unda lo por bisti paña tradicional y ‘pose’ hunto cu instrumento nan di Aruba.
Scol di Arte ta situa na Pastoor Hendrikstraat 103, kier atende na publico cu e area di parkeo di Scol di Arte ta otro banda di caminda dilanti e lugar.
Por ultimo Scol di Arte ta invita henter pueblo di Aruba pa pasa bishita pa pasa un rato agradabel cu henter famia. E evento aki ta posible danki na UNOCA.
