Motociclista di Aruba den accident fatal na St. Maarten

ORANJESTAD (AAN): Un motociclista naci na Aruba, a fayece Diaranson anochi den un accident violento na isla di St. Maarten. 

E tabata coriendo riba L.B. Scott Road ora cu diripiente un SUV blanco a sorteer su dilanti sin duna preferencia.  El a bay dal duro den e banda drechi di e vehiculo, y keda mortalmente herida, aunke e tabatin un helm bisti.  E motorcycle a pega candela tambe.

   Aunke Ambulance a tarda pa yega, el a ser transporta den situacion grave St. Maarten Medical Center, unda mey ora despues el a fayece.  E chauffeur di e SUV a sali ileso.

   E victima a wordo identifica como Jason Peterson di 37 aña, naci na Aruba pero desde 1985 cu 1 aña di edad el a bay biba na St. Maarten cu su mayornan na Simpson Bay.  Na Isla Ariba e ta doño di un Car Wash.  Esaki ta e di seis accident di brommer den un siman di tempo na St. Maarten.

   Jason a bay laga dos yiu muher atras, di cual uno ta bibando na Aruba.  Na famia di e fayecido ta bay palabranan di condolencia.  Potret cortesia The Daily Herald.