*Cada florin ta yuda e clientenan - ORANJESTAD (AAN): Diahuebs mainta a tuma lugar un conferencia di prensa, unda cu FAVI a lanza su accion di donacion.
Director di FAVI Setty Baarh a splica cu e accion di donacion ta algo cu FAVI a cuminza cune for di 1974.
“E ta e accion mas grandi pa recauda fondo pa nos organizacion”.
E accion di donacion ta encera cu nos tin colectantenan, esta personanan boluntario cu tur aña atrobe ta bin hunto pa yuda FAVI colecta e fondonan necesario pa nos por sigui brinda servicio y yuda nos clientenan den tur e areanan di nan bida, segun Baarh.
El a sigui bisa cu tin tambe e donadornan cu tur aña ta haci un donacion na FAVI.
Segun e director di FAVI, e colectante ta haya un lista di tur e personanan cu tur aña ta custumbra di haci un donacion y e ta bay cerca nan pa busca e donacion.
Esey na e donadornan fiho di FAVI, pero esnan cu kier bira donador nobo tin diferente opcion.
Bo por yega FAVI y haci bo donacion, bo por yama y FAVI lo manda hende pa busca e donacion y pa mas facil bo por haci un transferencia di banco.
Tin tambe e posibilidad di paga via e app di Pay.aw.
Baarh a bisa cu bo por haci un donacion di 1 florin mes y FAVI ta aprecia esaki, pasobra cada florin ta yuda.
