ORANJESTAD (AAN): Sra Enrita Werleman y su studiantenan ta presenta nan exposicion ‘Mosaik Picassiette’.
E exposicion bunita aki lo ta habri for di diaranson 26 di februari te cu diabierna 5 di maart, durante orario regular di biblioteca na O’stad.
Mientras arte di mosaik tradicional ta usa pida chikito di mosaik, pique assiette ta usa pida di tayo corta pa forma un obra di arte. Na Frances e palabra Pique Assiette ta nifica “recohedo di tayo” of “landron di tayo” y ta referi na usa tayo of recicla tayo kibra, sobra di glas y traha arte cu esaki. Un ehempel di picassiette tin na Chartres, Francia. E Maison Picassiette ta e trabou increible di e artista Raymond Isidore. El a nace casi na e mes un tempo cu Gaudi (artista renombra di Spaňa). Isidore, cu a siňa e technica su mes a cuminsa decora su cas.
A ser bisa cu e tabata recohe y colecta tayonan di dumpnan y tambe tabata haya donacion di otro hende. Sin ningun training den arte Isidore a pone e pida pidanan den cement y peganan riba e murayanan di su cas cu asina a bira un obra di mosaik. Awendia, La Maison Picassiette ta un destinacion turistico na Francia
Mas artistanan a sigiu traha obranan cu tayo.
Solange y Alexandre Piffer, Artista International di Mosaik Picassiette.
Na luna di mei binidero e pareha artista procedente di Sao Paolo, Brasil lo bin Aruba pa duna algun Workshop di Mosaik Picassiette.
Alexandre y Solange Piffer ta procedente di Pompeia (city) - Sao Paulo, Brasil. E pareha a cuminsa traha arte di mosaik na 1999 cu support di mama di Alexandre, cu ta un artista tambe. Alexandre tabata traha e tempo ey como un welderdo fini y tambe cu arte di mosaik. Nan a traha y siña durante 20 aña y a bira experto den nan arte.
Durante e ultimo 7 aña nan ta duna les. E prome obranan cu nan a traha tabata pa den nan cura. Nan ta biba den un region cu ta hopi seco y ora e matanan perde nan flor nan mes a cuminsa traha flor di mosaic pa decora nan cura. Solange and Alexandre ta traha diariamente cu mosaik. Esaki ta nan entrada, trahando arte pa otro hende, crea, desaroya arte y tecnica nobo y duna workshop.
Nan ta biaha rond di mundo educando, dunando lectura y dunando workshopnan. Nan a bishita paisnan manera Mexico, Alemania, Australia, Schotland y e aña aki tambe Aruba. Nan artenan di Mosaik ta inclui flornan y animalnan precioso.
Ate Mosa-Atelier Mosaic
Pa añanan Ate Mosa a sigui e artistanan aki y a tuma cursonan pa domina e tecnica di mosaic picassiette y tambe a duna cursonan y siña otronan. A traha flornan, gay, shoco y otro bestianan. No ta facil pa yega na tayonan bunita y artistanan ta pasa busca tur caminda tayonan pa nan kibra.
E exposicion bunita aki lo ta habri for di diaranson 26 di februari te cu diabierna 5 di maart, durante orarionan cu Biblioteca ta habri. Publico ta bon bini na biblioteca. Apertura ta diamars dia 25 di februari di 6or y mey pa 8or.
Asina ta, si bo kibra un tayo bo ta bay mir’e na un manera diferente. Tayo no ta pa pone cuminda so, pero por traha obra di arte tambe cu ne.
{gallery}Mosaik Picassiette, un exposicion unico na biblioteca{/gallery}
