Monumentenfonds Aruba contento con aña a bay exitoso cu hopi trabao di preservacion

Aña 2023 tabata uno monumental di principio te final

ORANJESTAD (AAN): Fundacion Monumentenfonds Aruba (SMFA) a cuminsa e aña finalisando mantencion di Nicolaas Store caminda a verf e monumento cual a conta cu bishita di famia Real na final di januari.

   Otro Monumento cu a haya mantencion e aña aki ta e edificio Contraloria General (School 1888 conoci como Algemene Rekenkamer) cual proyecto a keda combina cu un test na un parti di e fachada caminda a uza pleister y verf a base di calki y asina bay back na e material y tecnica original. E parti aki di e edificio lo keda evalua pa un periodo pa wak si e ta yuda cu e problema di ‘zoutuitslag’ cu tin na e edificio.

   A combina e proyecto di mantencion di e edificio di Algemene Rekenkamer cu un presentacion pa studiantenan di EPI caminda nan por a siña y practica e tecnica di aplicacion di calki.

   Despues di a finalisa e proyecto na ARA a continua cu e watertoren na San Nicolas cu un mantencion grandi caminda e repara e murayanan y verf e edificio completo parti pafor. Banda di esaki a inicia cu seguridad den e area di varios di nos monumentonan den Oranjestad, como un test pa asina baha e gastonan ocasiona pa vandalismo na e diferente monumentonan.

   E edificionan di Huisje Wild y Casita Geel na Weststraat tin huurdonan nobo y a keda transforma den respectivamente, oficina di Kwaliteitsinstituut Aruba y Moonshine Daiquiri Co. cu lo habri su portanan pronto.

  Pa e proyecto di Steenweg 19, Botica Aruba, a haci renobacion di e interior segun e necesidadnan di KOAL cu a habri e portanan di nan restaurant na principio di aña. Despues Cocolishi Studio tambe a habri su portanan na e piso ariba di e bunita monumento aki.

   Restauracion: Cu orguyo SMFA a anuncia cu Cas Veneranda den Wilhelminastraat a bira e siguiente edificio cu Monumentenfonds lo restaura cu financiamiento di Nationaal Restauratiefonds (NRF) y Stichting Algemeen Pensioenfonds Aruba (APFA). Hunto cu Sr. Geoffrey Wever, Minister di economia, y famia di Machi y Veneranda Arends a firma e koop- y huurovereenkomst pa Cas Veneranda.

   A presenta e bouwteam cu ta trahando actualmente riba e diseño di e edificio y a lansa e proyecto di Tales of Cas Veneranda caminda e comunidad completo por comparti nan recuerdonan y fotografianan di Cas Veneranda y famia Arends.

   Conscientisacion, educacion y cooperacion: Den luna di augustus a inicia e proyecto ‘Biba nos Herencia’ caminda cu hunto cu diferente partnersnan cultural a organiza encuentronan pa fotografia monumentonan di Aruba y comparti nos herencia tanto material y inmaterial riba e plataforma di Instagram. A organiza diferente Instameets y tur luna un challenge di fotografía cu tema nobo. E proyecto lo continua den 2024.

   Tambe otro aña lo continua y finalisa e proyecto di Eagle History Tour cu lo conta e historia di e refineria di Eagle pa medio di entre otro un audiotour, obhetonan di luz diseña pa Studio Goddijn y borchinan di informacion.

   Den september e highlight tabata riba e monumento di Uncle Louis Store, actual oficina di Directie Natuur en Milieu, na San Nicolas a keda nomina pa un Duurzaamheidsprijs y a logra gana e premio di publico, danki na e miles di votonan ricibi.

   Varios fondonan cultural a bishita Aruba y e directora di SMFA a bishita diferente organizacionnan riba terreno di monumentonan y cultura na Hulanda incluyendo e Nationaal Monumentencongres y Rijksdienst Cultureel Erfgoed na cual a duna un presentacion.

   Durante e bishita na Hulanda, e directora a topa cu Señora Cliné cu a acerca SMFA cu e interes pa laga un legado pa e fundacion. Pa cu esaki SMFA a haci un peticion y a ricibi un Culturele ANBI Status di Belastingdienst (impuesto) na Hulanda. Instancianan cu un Culturele ANBI Status ta conta cu beneficionan fiscal na momento di ricibi donacionnan. E donador tambe ta conta cu beneficionan cual ta haci esaki mas atractivo pa contribui na fundacionnan cu un status ANBI.

   Na final di aña a ricibi bishita di Nationaal Restauratiefonds (NRF) caminda a bishita y discuti proyectonan di restauracion financia pa NRF y tambe a firma un acuerdo caminda SMFA lo ta representante di NRF na Aruba pa prestamonan  comercial na e fondo di monumentonan Hulandes.

   Pa locual ta e Dutch Caribbean Heritage Platform hunto cu e demas islanan den Reino y den colaboracion cu Erfgoed Academie y Universidad di Curacao a organiza diferente curso y webinarnan y prepara pa un congreso cu lo tuma lugar otro aña na St.Maarten, Saba y St.Eustatius. E plataforma a ricibi fondonan di Mondriaanfonds pa e proyectonan educativo.

   Por ultimo, e team di Monumentenfonds Aruba a yama bon bini na Rousanne de Weever como presidente di e fundacion y Sandy van Tol-van der Paal como penningmeester. Alavez a tuma despedida di Robert Maduro y Stella Harms-Frantzeskakis gradiciendo nan pa e trabao eherce durante e ultimo añanan como miembro di directiva. E team di SMFA mes tambe a crece cu dos colega nobo, un stagiaire y diferente boluntarionan. Asina hunto como un team nos ta cla pa sigui preserva nos pasado pa futuro den 2024.

  SMFA su oficina lo cera dia 25 di december y nos lo ta back dia 3 di januari 2024.