Monton di droga exporta di La Guajira a wordo intercepta na Bahamas y Republica Dominicana

ORANJESTAD (AAN): Un total di 3 operacion anti-droga a tuma lugar e siman aki den Caribe, unda a logra di intercepta cargamentonan cu hunto a yega na 1.597 kilo di cocaina. 

Droga aki a sali for di La Guajira na Colombia, y cu danki na inteligencia di DEA, a logra di drenta accion y gara nan na tanto islanan di Bahamas y na Republica Dominicana.

   Esaki ta bira un golpi nobo y duro contra narcotraficantenan cu ta saca droga for di La Guajira, cu ta situa na e parti mas noordoost di Colombia, djis algun cien kilometer pabao di Aruba.

   Na Colombia pa colmo a caba di detene e cabezante yama ‘El Condor’ cu ta encarga cu e cartel cu ta traha di La Guajira pa saca cocaina sea via avion of riba lama, pa manda nan sea Venezuela, Islanan ABC, Centro America, of pa Republica Dominicana.

   Den e accion na Republica Dominicana y Bahamas, en total a detene 4 persona.  Polisnan na Colombia tin un Tipline 167 pa hende duna informacion di droga.  Un persona a yama y a bisa cu un Speedboat tipo Go-Fast color blauw cu 2 motor y dos persona abordo, yena cu cocaina a sali for di Punta Gallinas na La Guajira, rumbo pa Republica Dominicana.

   Cu e informacion ey, e dato a wordo duna na tur instancia den Caribe cu ta monitor movimento di botonan.  Y asina a logra di intercepta e Speedboat Go-Fast aki na 50 km zuidwest di Punta Salinas, na Provincia Peravia cu ta keda banda zuid di Republica Dominicana.  Den e boto a bin haya 739 kilo di cocaina, y tur dos persona a keda deteni.

   Un di dos accion a socede cu e mesun circunstancia, esta cu e boto a sali for di e sector conoci como Auyama na La Guajira rumbo pa Republica Dominicana.  E Speedboat Go-Fast aki a wordo intercepta door di autoridadnan Dominicano na 11 km zuid di e bahia di Enriquillo, na provincia Barahona.  Aki a intercepta 338 kilo di cocaina, y a detene dos hende cu tabata abordo.

   E ultimo accion a bin despues di informacion suministra na autoridadnan policial di Mayaguana, na Bahamas.  Cu e tip aki y haciendo investigacion rapido, nan a logra di intercepta un avion bi-motor colro blanco cu matricula HI-950, cu a lanta vuelo for di Venezuela rumbo pa Centro America, cu 520 kilo di cocaina den 18 paki di color shinishi.

   Un investigacion haci riba e cocaina aki, a determina cu e cargamento aki a sali di laboratorionan clandestino den zona rural di departamento Norte de Santander, y di eynan a wordo transporta scondi via truck te na centronan na La Guajira, y despues a drenta Venezuela cune pa pone e droga den avion, y a lanta vuelo for di un pista clandestino y bandona e pais.

   E cargamento intercepta na Bahamas tin un costo di como 18 miyon Dollar.  Tambe ta investigando cu nan a pone e matricula ey riba e avion, siendo cu e matricula ey ta wordo usa pa un otro avion di un aerolinea Dominicano.