Monton di documento di Bingo y tambe di Departamento DPL haya den dump ilegal na Franse Pas

Comosifuera un Dump #2 a wordo crea eynan

• A usa dos baki grandi pa lanta e monton di sushedad aki
• Si no haya e compania e ora Caribbean Bingo mes lo haya boet 

ORANJESTAD (AAN): Danki na ciudadanonan cu a topa cu sushedad benta den area di Franse Pas, a manda un notificacion via e app di Fixi, y mesora Bureau City Inspector a manda un Team pa check esaki riba Diahuebs siman pasa.  E ta un pida mondi net banda di un cas.

   Loke nan a bin topa cune, tabata un bista masha mahos y violando e naturalesa delicado di e zona aki.  Mesora e Team a bati alarma y exigi presencia di Ploeg completo cu a yega cu un baki grandi pa asina recoge tur e sushedad aki.

   Un cantidad di carchi di Bingo, documento y contractnan di Bingo, nota di discusion pa propaganda di Bingo, hunto cu monton di documentonan di Departamento di DPL, yen di formulario mas cu informacion sensitivo, incluyendo carta cu DPL a manda pa Aruba Aloe NV.  Tambe mas cahanan cu saco yen di documento, hunto cu sushedad di cas, stoel di sala, monton di trapi di aluminium pa piscina, garoshi pa lastra mercancia, cashi di camber, mesa di plastico cu pianan cu ta dobla.

   Tambe tin un bicicleta bieu color blauw, monton di hemchi di plastico, caha bashi di zapato, kabel blanco pa TV den cas cu connector RG-6, peluche di un poodle dog color cora, caha yen di juguete bieu, incluyendo action heroes di Batman, rugtas pa bay scol color camuflahe, un decor di macramè color cora, corchon, tapijt di cushina, mat di auto, pieza di auto, caha bashi di airco Daizuki, diferente canasta cu obheto aden poni den saconan transparente di plastico, monton di caha, incluyendo caha di gasket maker, filternan bieu di airco, cortina bieu di cushina, clechi di cama, tubonan PVC di coriente, y foam bieu na cantidad pa fura stoel.

   “E ta algo tristo ora cu nos a descubri esaki Diahuebs,” ta loke vocero Robby Rosel a declara na prensa.  “Un cantidad grandi di sushedad, y tambe saconan yen yen cu documento di Caribbean Bingo.”

   Rosel a bisa cu el a yama esnan encarga cu Caribbean Bingo, pero te ainda e persona encarga cu e Bingo no a yama City Inspector bek.  Pasobra nan kier sa ta cual ta e “compania” cu a traha hunto cune pa bay tira tur sushi afo eynan na Franse pas.

   Segun Rosel, no ta djis sushedad di oficina y di cas a haya eynan, pero tambe grofvuil di palo y mata, ramanan bieu, y ta parce cu ta drenta patras den e mondi, net pabao di cas di ex-Gobernador Interino na Franse Pas.  Esaki ta un acto lamentable, como cu Gobierno hunto cu Bureau City Inspector tin un campaña unda cu nan ta haciendo e isla di Aruba limpi, cuminzando na San Nicolas.  Otro siman e campaña lo yega Santa Cruz.

   “Ta hopi tristo caminda hendenan ta drenta cu pickup, bin te tras di e mondi aki pa benta tur desperdicio aki, cu no ta na su lugar,” Rosel a bisa di e sushedad haya eynan cu tur e documentonan di Caribbean Bingo y DPL.

   Bureau City Inspector aki lo bay pone baranca grandi pa cera e caminda, y tambe no bay pone nan sistemanan pa capta e autonan y pickupnan cu ora nan yega, un alarma automatico ta bay, y asina autoridad lo por bay mira nan plachi di number, pa asina ricibi boet cu nan merece di haya.

   Inspectornan ta investigando na kende e cas ta pertenece, pa saca afo kende ta doño di e tereno.  Rosel a splica cu nan ta contento cu Ecotec a yuda rapido cu e bakinan pa asina por lanta tur sushedad di eynan.  Y como cu a haya e documentonan di Bingo y DPL benta eynan, lo bay investiga pa haya sa kende ta esnan cu a bay benta esakinan afo den e dump ilegal, envez di a bay benta nan na e lugarnan cu a wordo destina pa haci esey.

   Vocero Robby Rosel a bisa tambe, cu si acaso City Inspector no logra haya sa kende ta e compania cu a bin benta sushi afo, e chens ta grandi cu propietarionan di Caribbean Bingo lo haya e boet, y esey ta un suma basta grandi.