Minister Glenbert Croes ta hopi feliz cu resultado cifranan 2022:
*desempleo a baha na e cifra record di 4.3%
ORANJESTAD (AAN) — Minister di Labor, Energia y Integracion, a dirigi palabra na comunidad den e conferencia di prensa di Gobierno, di Dialuna 4 di September 2023. El a informa tocante e resultado di cifranan laboral di aña 2022, realiza a base di e encuesta cu a tuma lugar door di Directie Arbeid en Onderzoek (DAO), Banco Central y CBS. E mandatario a destaca cu aña 2022 a caba cu un cifra di desempleo di 4.3% cu locual gobierno ta hopi satisfecho.
E resultadonan aki ta refleho di e recuperacion economico y laboral, den termino general, cu ta tumando lugar aki na Aruba. Na prome lugar, e cifranan ta mustra cu e cantidad di hendenan cu ta trahando, cu na 2021 tabata di 55.0%, y asina a keda durante e prome lunanan di 2022, pero pa November el a subi na 58.1%, y tambe ta mustra e progreso entre hende homber y hende muher. Hende homber activo ta 62.6% y hende muher 54.3%. Pues, den tur por mira un aumento, y obviamente esey ta un señal positivo cu e cantidad di hendenan cu ta trahando ta sigui crece.
E tasa di desempleo ta yega na un record historico den e dos decadanan aki, y tambe pa Siglo 20-21, ta 4.3%. E ta un record “low” cu obviamente ta yena nos cu satisfaccion.
E dignatario a comenta cu e ta Minister di Labor desde aña 2017, y cordando e nivel con nan a haya e tasa di desempleo y a cuminza traha pa bah'e, na 2019 prome cu pandemia, el a baha te na 5.2%. Pandemia a dal 2020-2021, y por mira e impacto di e taza di desempleo. Desde e pandemia, door di nos turismo y tur industria relaciona cu ne, e recuperacion economico laboral y recuperacion en general pa nos pais, ta bayendo extremadamente den bon rumbo, unda cu el a keda baha, y na 2021 ainda por mira un cifra di desempleo na 8.8%, na Juni 2022 e tabata 6.6% y pa fin di aña ey a mire na 4.3% y esey ta algo cu ta haci nos inmensamente feliz.
E tasa di desempleo pa hende homber y hende muher ta mustra cu pa e sexo masculino ta 3.3%, pa sexo femenino ta 5.3%, y esey kiermen cu desempleo pa ambos, ta bahando. “Esey ta haci nos hopi feliz pasobra e kiermen cu nos hendenan ta bayendo bek na trabao”, Minister Glenbert Croes a expresa.
{gallery}Encuesta DAO, BCA y CBS{/gallery}
