Mon Plaisir College HAVO a logra 70% cu a gradua prome tanda

ORANJESTAD (AAN): Un cantidad di alumno, mayor, famia y amigonan a reuni riba plenchi di Mon Plaisir College HAVO pa asina mira momento cu e resultado di examen ta bira conoci.

   Richelle Noël, kende ta Rector di e scol, a bisa cu e ta un anochi historico, como cu el a bira pa prome biaha cu klasnan di HAVO ta slaag na e scol.  Manera ta conoci, e scol aki antes tabata consisti di solamente MAVO.  Pero awor a bin HAVO y VWO acerca.

   Pues 2024 a conoce e prome grupo cu ta gradua pa HAVO di Mon Plaisir.  E scol tin dos Klas di HAVO, y en total 37 alumno a participa na e examen.

   Di esaki, 70% di alumno a gradua.  E anochi a pone spotlight riba e alumno Alysa-lynn Koolman, kende a bira e mihor graduado, y a logra acumula 60 punto.  El a ricibi un bunita gesto di aprecio di Rector Noël.  Tabatin animacion di Brassband e anochi aki tambe.

   Esnan cu no a logra gradua den prome tanda, por a bay inscribi mesora pa un chens pa haci her-examen.  Esaki ta inclui alumnonan cu a gradua, pero lo kier mehora nan puntuacion.

   Awor cu e aña escolar ta tras di lomba pa e examenklasnan aki, Rector Noël a gradici full su team, docentenan, y mayornan, y tambe SPCOA su directiva pa e forma cu nan ta sostene e team.