Colegio Arubano HAVO a obtene 68% den prome tanda di graduado

ORANJESTAD (AAN): Den oranan di atardi, un grupo grandi di mayor, alumno, docente, amigonan a reuni riba tereno di Colegio Arubano na Vondellaan

pa asina ta testigo ora cu ta divulga resultado di prome tanda di Examen pa HAVO y tambe VWO.

   E alegria ora cu e listanan di tanto HAVO y tambe VWO a baha, tabata duna indicacion cu e alumnonan a haci nan best durante ultimo añanan pa a logra esaki den e prome tanda.

   Rector Tim Croes tambe tabata contento.  El a splica cu HAVO tabatin en total 260 alumno cu a pasa examen, y di esaki un grupo di 177 alumno a gradua den prome tanda.  Esaki ta un porcentahe di 68% cu ta obtene nan diploma.  Esaki ta un mihor resultado compara cu aña escolar 2022-2023.

   Croes a indica cu mas alumno ainda por gradua, si nan logra obtene mihor punto den Her-Examen cu ta na caminda.

   Na final tabatin animacion di Massive Brassband tambe pa trece tur hende den extra ambiente.