Modernisacion pa un 'Elektronische Kind Dossier” lo garantisa continuidad den guia, desaroyo y salud di mucha y hobennan

Minister Endy Croes:

ORANJESTAD (AAN): Durante Conferencia di Prensa di Gobierno di Aruba, Minister Dangui Oduber hunto cu Wit Gele Kruis (WGK) a firma un convenio pa intercambio di informacion digital, esta “Elektronische Kind Dossier” (EKD) pa Jeugdgezondheidszorg (JGZ).

            E meta di e convenio aki ta pa garantisa continuidad den guia, desaroyo y salud di nos mucha- y hobennan.

            Durante e conferencia, Minister Endy Croes hunto cu colega Minister Dangui Oduber a hiba palabra. Tambe, dr. Janice Essers-Hooft y drs. Jan Hubert di JGZ a duna presentacion di modernisacion di e programa actual cu JGZ ta uza y con esaki lo transforma pa un sistema di registracion den forma di “cloud based”.

            Manera ta conoci, WGK ta haci uzo di e experticio di “Jeugdartsen” di JGZ pa por ta samina y sigui e desaroyo di cada mucha entre di 0-5 aña. Despues di 5 aña JGZ ta sigui monitor e desaroyo y salud di e muchanan na scol basico y scol primario. E profesionalnan di JGZ pa medio di e file electronico lo por ricibi y comparti informacion pa un miho continuidad di cuido pa e mucha di 5 pa 22 aña.

            E “Elektronische Kind Dossier” ta haci uzo di tecnologia, innovacion y e parti digital unda ta intercambia data di cada mucha pa facilita e proceso pa por sigui monitor e salud y e aspecto social di e muchanan. Cada mucha lo tin nan “social-medisch dossier” den un forma electronico.         Modernisacion di e sistema aki lo percura pa registra cada caso di e muchanan, analisa y conserva den manera mas efectivo y eficiente pa nos profesionalnan den salud. Tambe, e modernisacion lo minimalisa foutnan den registracion, lo por haci e intercambio entre medico y psicologo mas facil.

            Departamento di Asuntonan Social tambe lo tin acceso na e data aki y for di tempran por nota si e mucha mester di ayudo y/of guia. Lo percura cu e protocol di privacidad ta uno estricto pa garantisa siguridad di nos muchanan. 

Finalisando, Minister Endy Croes ta felicita colega Minister Dangui Oduber y Minister Rocco Tjon y henter nan ekipo cu a haci e proyecto aki posibel. Alabes ta gradici e profesionalnan, ekipo di maneho di DVG, JGZ, Wit Gele Kruis (WGK) y tur cu a traha riba e bunita proyecto aki  y pa asina haci uzo di data pa por sirbi miho nos muchanan.