Ronella Croes, CEO di ATA:
*Por ehemplo den e sistema di educacion: EPB, Colegio EPI y UA
ORANJESTAD (AAN) – E tema di scarcedad di hende pa traha den e sector Horeca, ta uno cu tambe tin e atencion di Aruba Tourism Authority (ATA).
CEO di ATA, Ronella Croes, den un entrevista cu DIARIO, a duna diferente updates. “ATA, como un di e partidonan clave ta sinta den diferente comision cu ta trata e asunto laboral y for di unda a sali diferente recomendacion.
Ronella Croes a señala cu algo hopi importante ta cu como Pais Aruba mester ta efectivo y eynan mester reconoce e papel di diferente organizacion. Por ehemplo, AHATA, Aruba Food & Beverage Association (AFBA), cu ta hopi cerca di e dunador di trabao, pues ta organizacionnan cu ta representa dunadornan di trabao.
“Nos ta sigui e ora ey e liña di loke ta trata nan prioridadnan, nos ta purba di sostene nan unda cu por, y di otro banda ATA ta dirigi su enfoke riba otro aspectonan cu tambe ta importante, y cu por purba yega na solucionnan”, CEO di ATA a señala.
El bisa cu asina tin diferente partido cu ta enfoca riba mesun cos. Den e caso di ATA, no solamente e ta participa den e comisionnan menciona pero, por ehemplo, e ta mas presente den e parti di educacion.
“Den e parti di e sistema di educacion manera EPB, Colegio EPI, Universidad di Aruba. Pakico? Pasobra akinan nos ta enfoca riba yuda logra cu esnan cu caba cierto estudionan, encaha miho den e sector laboral. Eynan nos tin un buraco ainda, pasobra no necesariamente pasobra nan a caba, nan ta cla pa drenta. Anto eynan nos por hunga un papel, y di otro banda, otro punto di atencion ta cu nos ta dirigi nos mes riba entusiasma hobennan pa drenta den e sector di turismo”, Ronella Croes a indica.
El a subraya cu esaki ta dos aspecto cu ta haya, primordialmente, atencion for di ATA compara cu otro aspectonan. “Y den e ultimo parti aki mi por bisa cu, por ehemplo, cu nos a organiza un conferencia basta amplio aña pasa na November. Nos a yam’e ‘Voices of Tourism’ y akinan nos a dirigi netamente riba esnan di Colegio EPI, EPB y Universidad di Aruba”, Ronella a señala.
“Akinan ta bay mira un ATA cu hopi mas esfuerzo riba esaki, e aña aki, CEO di ATA a agrega. Di otro banda, el a indica, ATA tin hopi dialogo cu sector priva, entre otro cu esnan den e sector di F&B no solamente por medio di su Asociacion pero tambe via diferente comerciante.
“Nos ta haci esaki proactivamente y nos sa di diferente pensamento di nan banda tambe, no solamente zorg pa tin un miho ‘fits’, zorg pa entusiasma hobennan; pues, esaki tambe ta trayectonan unda ATA ta mira con nos por duna nos sosten tambe na e sector priva fuera di traha hunto cu scolnan”, Ronella Croes a relata.
