DNM a lansa su database di e sortonan proteha di flora y fauna

Shahayra Croes, Relacionista Publico:

ORANJESTAD (AAN) Recientemente, DNM (Departamento di Naturaleza y Medio Ambiente), a lansa e “Database” di e flora y fauna, di e sortonan proteha.

Shahayra Croes, Relacionista Publico di DNM, a relata: “Dus, tur nos bestia y matanan cu ta proteha via nos ley local (Landsbesluit Decreto Nacional pa Proteccion di Flora y Fauna), unda por haya tur e sortonan di flora y fauna cu ta proteha y tin leynan mara pa proteccion na dje y tambe, consecuentemente, e maneho di boet en caso di haci nan daño”.

El a agrega cu e Landsbesluit ta dividi entre un lista di flora y fauna, y den total nan a publica un 124 sorto; rond di 70 di flora, y riba 55 di fauna.

“E proyecto aki ta un iniciativa di DNM desde inicio di e Ley na 2017. Nos a bin ta publica riba nos facebook page e potret di e sortonan cu nan nomber endemico y nan nomber local y e ley cu ta pertenece na dje. Y por haya tambe, na Papiamento, informacion di e sorto, con grandi ta bira, su habitat, con ta crece den nos naturaleza di Aruba, dus, tur informacion cu ta pertenece na e sorto.

Nos a saca esaki na aña 2017 cu nos proyecto ‘Conoce nos flora y nos fauna’ pero awe, nos ta lanza riba nos website, un pagina cu ta keda mas stabil eynan cu tur e informacion. Nos ta lansa e Database di Flora y Fauna, cu ta pa nos habitantenan, investigadornan, tur e amantenan di naturaleza, pa busca informacion di tur nos sortonan proteha”, Shahayra Croes a reitera.

El a expresa cu e ley ta strictamente pa proteha e mata y nan no ta encurasha pa e sortonan proteha wordo propaganda pa remedi di tera. “Por ta den pasado si, nan tabata tin e funcion eynan, pero ora e sorto ta proteha bo no por bay sak’e di naturaleza, bo no por kita un taki, no por kibr’e, hal’e. Mester tin un permiso pa bo por haci algo na e sorto proteha”, PR, Shahayra Croes a señala.