Dr. Joyce Pereira:
*Papiamento ta e idioma cu mayoria ta papia na Aruba
ORANJESTAD (AAN): For di aña 1946, despues di guera, UNESCO a cuminsa publica riba e tematica di idioma materno pasobra tabata hopi conoci cu den e paisnan cu tabata colonisa, idioma materno tabata oprimi. Un di e resultadonan di e opresion di idioma materno, di cultura, di identidad di un pueblo ta cu e poblacion no ta yega na un nivel di bida mas halto. Asina dr. Joyce Pereira di Fundacion Lanta Papiamento a duna di conoce.
UNESCO ta declara cu enseñansa mester ta basa riba idioma materno di mayoria di e paisnan. Enseñansa mester ta multilingual teniendo cuenta cu e alumnonan di e diferente gruponan minoritario den comunidad. Cu gradualmente por introduci otro idioma den enseñansa como materia. E no ta bisa como idioma di instruccion, pero como materia, a splica.
Den e acercamento multilingual ta uza didactica moderno manera 'translanguaging' cu ta yuda e alumnonan cu otro idioma pa surpasa e bareranan y yega na e dominio desea di e idioma dominante, cu ta e idioma di e mayoria di e pais, y cu asina so enseñansa por aporta na desaroyo sostenibel, a indica.
Con e situacion ta na Aruba?
Segun Pereira, na aña 2013, Aruba a haya un scual pisa di UNESCO. Den un documento, nan a skirbi c'un di e problemanan mas grandi den educacion ta e persistencia di e modelo di educacion hulandes cu no ta adapta na e necesidadnan local. Esaki ta trece cu ne cu e studiantenan por ta vulnerabel pa cay den abandono di scol (drop-outs) y consecuentemente cay den crimen of den gang, etc. Esey Aruba mester cambia mas lihe posibel, el a bisa.
A agrega cu Papiamento te ainda ta e idioma mas popular na Aruba pasobra ta e idioma cu mayoria ta papia na Aruba. Mayoria evento ta na papiamento, prensa ta na papiamento, tur caminda cu ta bay ta papiamento. Ta masha tiki bes cu ta bay un evento y ta papia na hulandes , ingles of spaño.
Segun cifranan, ingles a haya e mal nomber di ta e 'killer language', esta e idioma asesino pasobra si mayornan, enseñansa no paga tino, ingles ta come e idioma cu no ta den scol. "Pasobra e mucha no ta haya un bagage mas grandi pa fortalece su papiamento. (...) Pero si e ta haya laptop, su telefon. Eynan e ta haya ingles cu ta plama tur caminda. Esey e ta siña (...) anto papiamento por bay atras", a remarca.
