ORANJESTAD (AAN): Diadomingo, 2 di april ta Diadomingo di Rama, un fiesta Cristian cu ta cay riba e diadomingo prome cu Pasco di Resureccion.
Ariba Diadomingo di Rama ta conmemora entrada triunfal di Hesus na Herusalem y ta e comienso di Semana Santa.
Riba e dia aki fielnan ta topa na misa pa ricibi rama bendiciona; nan ta sali den procesion bao canto di alegria. Cu e rama bendiciona nan ta traha un cruz pa colga na muraya na cas of pone den nan Bijbel.
Pastor Jairo Maduro y Pader Jose M. Nava ta invita tur parokiano y nan famia, special muchanan cu ta bay ricibi nan Prome Santa Comunion y hobennan cu ta preparando pa nan Confirmacion pa uni den e celebracion di Diadomingo di Rama y topa 7:30 di mainta na Plaza Curason Inmaculada di Maria pariba di misa, unda lo bendiciona tur e ramanan.
Cu rama den man, fielnan lo sali den procesion. Lo pasa riba caminda grandi direccion pa e rotonde, bira na man drechi riba Caya G.F. Croes y na altura di Colegio San Hose ta bira y termina na entrada principal di misa. Ta sigui cu Lectura di Pasion di Señor y celebracion Eucaristico cu Coro “Divino Niño”.
E siguiente celebracion Eucaristico ta 11:00 di mainta (na Spaño) y 6:30 atardi cu Lectura di Pasion di Señor. Yega rumannan den Cristo, pa hunto den Semana Santa, celebra e misterionan di Pasion y Morto di Cristo. Masha danki y cu Paz di Cristo sigui reina semper den boso curason.
