Segun Dr. Casseres: *1% di e pashentnan cu e variante omicron lo por yega cuido intensivo
ORANJESTAD (AAN): Dr. Yuri Casseres a duna di conoce den conferencia di prensa di Crisis Team Covid-19 cu ta conoci mas o menos 6 porciento di e pashentnan cu tabata positivo cu delta tabata wordo interna.
Pa loke ta omicron ta pronostica di ta 40 pa 45 porciento menos di esey. Ta spera cu riba e piso normal entre 2 pa 3 porciento di e pashentnan cu ta positivo lo yega eynan y un porciento di esey lo yega riba cuido intensivo, Dr. Casseres a splica.
E medico a señala cu si ta wak e cifranan di antayera, esey kiermen cu toch lo bay 'verwacht' un parti di e personanan aki cu lo yega Hospital. Dicon nan no a yega ainda? Un di e rasonnan, a señala, ta cu hopi di e pashentnan cu ta test positivo aworaki ta entre 18 cu 45 aña. Esaki ta nifica cu ta hende jong cu no ta haya e omicron asina duro cu mester wordo hospitalisa.
Ora e grupo mas grandi haya omicron ta spera cu lo presenta un aumento den e cantidad di personanan den hospital. Ta spera cu no, pero esey ta locual ta pronostica, Dr. Casseres a duna di conoce.
