Reunion publico yama pa PPA cu sosten di FUTURO y AVP
*Esaki ta un muestra di un nivel halto den cual Parlamento por debati
ORANJESTAD (AAN): “Un reunion di nivel halto, al caso y cu un rol constructivo a tuma lugar awe den sala di Parlamento”, asina e lider di fraccion di PPA, Otmar Oduber, a duna di conoce na final di e tratamento den un reunion publico, di e sucedido unda un hoben di apenas 19 aña a perde su bida den un confrontacion cu cuerpo policial. Oduber a accentua, dirigiendo su mes na e mayornan di Ayden sinta den publico, cu ta imposibel pa trece e hoben bek meimei di nos y cerca di su sernan keri, pero cu definitivamente su mayornan por ta sigur cu su memoria a trece un Parlamento hunto pa asina evita cu e sucedido tristo y dramatico aki por ripiti su mes.
E MOCION ENTREGA
Consideracionnan:
- Recientemente un hoben di apenas 19 aña a perde su bida den un forma tragico lagando atras un yiu chikito y un famia inconsolable;
- Un sucedido tragico asina no por ni mag presenta su mes un biaha mas;
- Pueblo di Aruba ta hopi conmovi di e tragedia aki y ta vocifera nan preocupacion y indignacion tocante tocante e proceduranan hiba den e caso aki;
- Cuerpo Policial di Aruba, cu mester mantene y salvaguardia orden publico pa medio di ehecucion di leynan relevante, tambe a express nan lamenta pa cu e incidente tragico aki;
- Cuerpo Policial di Aruba, cu mester mantene y salvaguardia orden publico pa medio di ehecucion di leynan relevante, mester por sigi depende riba e confiansa di pueblo cu nan t’ey pa mantene orden publico;
- Cuerpo Policial di Aruba y su sindicato kier mantene y salvaguardia orden publico pa medio di ehecucion di leynan relevante, a expresa di ta desea di tin suficiente instrumento pa ehecucion di un maneho mas efectivo y transparente pa salvaguardia siguridad di e ciudadano pero tambe di e agentenan policial;
- Un grupo grandi di nos pueblo ta haya cu tin un falta di transparencia di Ministerio Publico den e maneho di investigacion di e reciente caso tragico;
Instruccionan na gobierno di Aruba:
- Pa dentro di un termino determina, entrega cu maximo prioridad e leynan necesario yega Parlamento di Aruba pa ehecuta un maneho cu ta inclui e.o. “body camera y dashboard camera” mas efectivo, transparente y sigur pa tanto e miembro di cuerpo policial como tambe e ciudadania, den mantencion di orden publico;
- Entrega prome cu tratamento di presupuesto 2025, pero dentro di un tempo maximo di 1 luna na Parlamento un rapport cu tur e prioridadnan di nos cuerpo policial y un plan di alocacion di fondonan necesario pa inversion den training, sosten psycologico y materialnan necesario pa e miembronan di Cuerpo Policial pa nan por sinti mas prepara y sigur den ehecucion di nan funcion;
- Pa prepara un “plan van aanpak” pa atende a corto, medio y largo plazo cu e scarcedad halto cu ta existi caba pa mas di 20 aña, pa loke ta e “onderbezetting” den nos cuerpo policial;
- Pa a corto plazo pone na disposicion di cuerpo policial e.o. un sistema di sosten psycologico na e personal di cuerpo policial por medio di entre otro psycologonan interno como tambe externo pa tanto session obligatorio como di iniciativa propio;
- Pa presenta dentro di 6 luna leynan necesario na parlamento pa haci “drugtest” un regularidad den e cuerpo di polis;
- Pa haci un estudio di e necesidadnan pa introduci un seguro (risico verzekering) y asina yama “gevaren premie” pa nos “surveillancediensten”;
- Pa percura pa un investigacion husto, transparente y imparcial tuma lugar unda comunidad por keda informa y convenci den e objetividad cu esaki ta tuma lugar y asina re-confirma e confianza cu comunidad mester tin den su sistema judicial;
Y ta pasa pa orden di dia
E mocion aki presenta pa
PPA a keda sosteni pa tur 4 fraccion den Parlamento y a worde aproba tambe unanimamente.
Señor Oduber a mustra su gratitud na miembronan di cada fraccion pa nan sosten brinda y tambe su satisfaccion pa tin un mocion aproba cu un contenido skerpi, al caso y cu varios proposicionnan y instruccionnan na gobierno cu e meta di contribui na trece solucionnan structural.
