A reuni cu formadornan Mike Eman y Gerlien Croes
ORANJESTAD (AAN): Siman pasa, CEDE Aruba a reuni y dialoga cu formadornan di Gobierno di Aruba. Presidente di hunta di directiva di CEDE Aruba, Sra Sheila van Veen y Director General, Señor Daniel Tecklenborg a reuni cu e comicion di Formacion di Gobierno nobo di Aruba, unda CEDE Aruba a presenta un propuesta y vision pa un aliansa strategico entre Gobierno y CEDE ARUBA na bienestar di iniciativanan di comunidad y tambe un grupo grandi di fundacion vital ariba e isla. Durante e reunion, CEDE Aruba a pone enfasis riba su Compas Strategico 2022-2026, cu ta basa riba cuatro pilar principal:
Empodera y involucra e Ciudadano – Promove voluntarismo local y internacional, participacion civico, especialmente bou di nos hoben.
Bienestar di comunidad y solidaridad – Fortifica plataforma di barionan, centronan di bario, participacion di NGO den maneho di bario y mehoracion di espacio recreativo.
Reduci pobreza y aumenta auto-suficiencia – Provee apoyo dirigi na e grupo mas vunerabel y fomenta independencia financiero. Esaki ta un are p aco-crea entre NGO cu Gobierno.
Crea Organizacion Fuerte y Colaborativo – Fortalece e capacidad di e NGO nan y sigura e alineacion cu e necesidadnan di e comunidad.
Peticion pa mas alineacion entre Gobierno di Aruba y NGO’s: CEDE Aruba ya caba tin un protocol di colaboracion cu Gobierno, cu ta regula e contribucion di Gobierno den CEDE Aruba pero tambe palabracion tocante e menaho e sostene centronan di bario y trabao den bario. Durante e ultimo añanan, e protocol aki a resulta den un aumento di fondonan di exterior significante.
Durante e combersacion CEDE Aruba a enfatiza riba e necesidad pa amplia e protocol, entre otro dedica na co-creacion den maneho entre Gobierno y NGO’s pa por atende den un miho forma cu e comunidad mas vulnerable. E organizacion a propone un model cu atencion specifico riba:
(*) Mehora e accesibilidad den servicionan gubernamental y e infrastructura den bario.
(*) Programa mas horizontal pa por facilita e colaboracion entre sectornan.
(*) Un sistema di subsidio mas eficiente pa sostene y expande e iniciativanan di NGO.
(*) Mehora acceso na programanan di Union Europeo y otro fuentenan financiero.
Vision Regional: A base di experiencia di colaboracion entre islanan, CEDE Aruba a propone na gobernacion nobo, pa fortifica e alianza di NGO’s riba nivel di Reino, trahando den colaboracion cu partnernan di Curaçao, St. Maarten y Caribisch Nederland (Bonaire, Saba y Sint Eustatius) pa asina comparti recurso, experiencia y strategianan di financiamiento. Gobierno por hunga un rol den dialogo cu e otro gobiernonan den esaki.
Na e momento aki CEDE Aruba ta manehando dos programa regional caba y por hunga un rol pa facilita e colaboracion cu organizacionnan di desaroyo ariba e otro islanan.
Accionan di prioridad pa 2025: Cu bista den futuro, CEDE ARUBA a presenta iniciativanan di prioridad concreto pa 2025, cua ta inclui:
(*) Desaroyo di um plan pa un Centro Nacional di Prevencion, un iniciativa colectivo di NGO’s.
(*) Fortifica e structura di trabao pa hubentud cu voluntarionan internacional.
(*) Organiza seminario regional pa trahadornan pa hubentud.
(*) Ehecuta e programa Samen Families Versterken (Oranje Fonds, Kinderpostzegels).
(*) Expande e sosten na iniciativa di ciudadano den barionan.
(*) Construi un parke di hunga y area recreativo den Lago Heights Park.
(*) Aumenta e acceso na iniciativanan di arte y cultura atraves di e programa Let’s Act.
CEDE Aruba a reafirma su compromiso pa construi un sociedad civil mas fuerte y resiliente atraves di partnership cu stakeholders local y internacional. Aunke cu CEDE Aruba a mustra aribe retonan grandi den sector social, e organizacion a expresa su optimismo na e Gobierno nobo y e necesidad pa traha mas preventivo tambe.
CEDE Aruba ta spera cu Gobierno por adopta e enfoke di colaboracion aki pa por genera cambionan significativo pa e comunidad di Aruba.
Top of Form
