Pader Jose Miguel Nava:
ORANJESTAD (AAN) – Pader Jose Miguel Nava, den entrevista cu DIARIO, a menciona cu FE den Dios ta nifica crecemento personal. El a subraya cu si mañan e ta descubri cu Dios no ta existi, e por bisa cu el a fracasa y cu el a perde tur su tempo consagrando na Dios y por puntra pakico el a perde su tempo.
“Pero mi ta bisa awo ‘NO! Mi no a perde mi tempo. Pakico? Pasobra e FE Cristian a hiba mi pa cada dia mi por bira e miho version di mi mes, y mañan mi ta anhela pa den futuro mi ta den comunion pleno cu Dios den e paraiso. Esey ta un invitacion pa tur hende. E Fe Cristian ta profundamente humano, y ta yuda nos pa nos por recupera”, Pastor Nava e señala.
El a reitera cu nos, cu Cuaresma, ta yama pa crece. “Pa prepara nos pa participa cu Cristo Hesus den Su Pasion, Morto y Resureccion. Asina, meymey di tur e problemanan di nos pais, y tur e problemanan den nos famia por ta bibando, y nos mes por ta bibando, tempo di Cuaresma ta un tempo pa cana hunto cu Hesus den cada caminda di Cruz of Viacrusis, nos ta yama pa uni nos cu Cristo Hesus. Presentando na Hesus tur nos problemanan, nos deseonan di cambio, nos deseonan di comparacion, y bisa Hesus, Señor mi kier cana cu Bo, mi kier bay hunto cu Bo te na Cruz, pero mi kier hunto cu Bo tambe, Resucita!” Pader Jose Miguel Nava a remarca.
