EILAT: E candidata pa Miss Venezuela, Luiseth Materán a presenta Diahuebs e Trahe Nacional cu e lo presenta cune awe Diabierna den e anochi di Semi-Final,
cu ta un competencia preliminar pa e di 70 certamen di Miss Universe 2021 na ciudad di Eilat, na Israel.
Via di social media, e candidata di Venezuela a mustra cu su trahe a wordo diseña pa Carlos Pérez di Valencia, y ta resalta e beyeza di e flor nacional di Venezuela, esta e Orquidea.
“Cu hopi amor y orguyo, mi a dicidi na presenta e magia, sutilez, beyeza, y harmonia di nos Orquidea nacional. Awe mas cu nunca mi ta sintimi honra di bin di un pais di asina hopi maraviya natural cu nos mester cuida y preserva,” ta loke e candidata Luiseth a indica riba social media.
E flor ‘Orinoco Superba’ ta un variedad di Orquidea cu ta crece na rand di Rio Orinoco cu ta caracteriza su mes no djis pa su yamativo color lila, sino tambe pa e biña scur di su lobulonan, y e geel di e parti di mey-mey cu lineanan fucsia.
E certamen di beyeza e biaha aki a haci algun sesion di potret den forma natural, y pa esaki a escoge un grupo di candidata, y e latinonan cu a haya privilegio pa esaki tabata Venezuela, Argentina, Republica Dominicana, y Chile.
