ORANJESTAD (AAN): Manera ta conoci, un problematica basta serio na Aruba ta esun di e cachonan sin doño cu tin ariba caya,
pero tambe ultimamente a cuminsa ripara cu banda di esaki tin yen cacho of pushi cu doño cu ta perde.
E tema aki ta un tema cu por mira ta un tendencia tur dia riba e rednan social aki na Aruba.
Ta increibel pa mira e cantidad di bestia, no solamente pushi y cacho, cu ta aparece riba entre otro Facebook, unda nan doñonan ta pidi ayudo pasobra nan mascota ta perdi of a wordo horta.
Lamentabelmente, mester trece dilanti tambe cu algun di e mascotanan aki cu ta wordo horta nunca ta wordo recupera mas. Esaki ta sosode mas frecuentemente ora cu e cacho of e bestia ta uno di raza.
Banda di esaki ta sosode cu algun di e bestianan aki ta wordo gedal pa auto y nunca mas e doño ta haya sa na unda e pober mascota a keda benta sin bida. Esey ta locual por a mira a sosode cu un cacho cu a keda benta pa basta siman sin bida riba Watty Vos Boulevard.
Ni un hende a bay piki e restonan di e pober cacho aki. Ni Serlimar ni ningun otro instancia. Eynan a cacho a cuminsa bira weso pa despues cuminsa disparce poco poco.
E temporada di tira clapchi ta den yega y esaki ta e dianan unda mas y mas cacho lo bay riba caya spanta pa motibo di e desordo. Nan lo core tur spanta den busca di un refugio cu nunca nan lo haya.
Hopi fundacion cu ta traha na bienestar di e bestianan ta boga tur aña pa tene cuenta cu e cachonan y cu e pushinan durante e temporada di fin di aña. Pero por constata cu tur aña ta mesun cos. No tin ningun sorto di consideracion pa cu e bestianan, principalmente cu esunnan ariba caya.
Mesun topico ta bin bek caba rato y esaki ta esun cu tin di haber cu maltrato di bestia.
Maltrato di bestia no ta solamente dal un cacho of no dune awa of cuminda. Maltrato di bestia tambe ta kere cu pasobra bo a cumpra of bo a adopta un cacho of un pushi esey ta duna bo derecho na laga e pober bestia mara henter dia of cera den un espacio reduci unda casi nunca of nunca nan ta haya contacto cu hende.
Esaki ta sosode no solamente na algun cas aki na Aruba pero tambe tin negoshinan cu ta kere cu pone un cacho como 'security' lo scapa nan di paga un persona pa ladron no comete fechoria den nan lugar.
Asina por keda sigui menciona casonan cu ta sosode aki na Aruba masha tristo mes y cu apesar cu ta wordo denuncia un, dos, tres biaha of mas, nada ta cambia.
Na diferente pais, a bin cu leynan unda maltrato di bestia ta castibel cu prison. Na Francia por ehempel, a prohibi te hasta e benta di cacho y pushi cu e meta di lucha contra e maltrato. Nan ta alega cu e mascotanan no ta co'i hunga, ni bienes ni productonan di consumo.
Ta asina cu un frances di cada dos tin un mascota, pero cada aña ta laga den abandono rond di 100.000. E hecho di mata boluntariamente un animal di compania lo wordo considera delito y no un simpel infraccion.
Esaki sigur ta un tema cu mester wordo considera aki na Aruba pa asina pone un stop na e tantisimo maltrato contra bestia cu ta sosode.
