Christmas Dinner di ATCO Indians tabata tremendo

ORANJESTAD (AAN):  Recientemente a tuma lugar Christmas dinner di e ekipo campeon di baseball, esta AA ATCO Indians, esaki a tuma lugar na nan cas mes, na Centro di Bario Noord.

            E anochi aki tur e hungador nan por a bin cu un invitado, pa asina hunto por a disfruta di un dushi anochi, anima pa e banda “Melo”.

            Trempan tur hende por a pasa coi nan plato a la style di Pasco, despues cu e cuminda a baha, esnan presente por a bay los e pia nan, ya cu nan tin basta dia sin baila. Despues a yama e hungador Kelvin Silvania dilanti, pa asina dune un caluroso bon bini y alavez lage firma su contract y tambe dune su uniform pa e proximo temporada. 

            E anochi aki tambe a haci entrega di premio na esnan cu mas a destaca durante e Campeonato cu a pasa. Tambe a duna reconocimento na un hungador cu ta bay laga e team. Mester bisa cu despues di basta dia tabata tin un bon Christmas dinner asina, caminda cu tur esnan presente a goza di un tremendo anochi.

            Manager Eugene Helder y su staff tecnico di coaches nan kier a yama un danki na tur esnan cu di un of otro manera a sa di apoya y sostene nan vooral e aña cu a pasa, y alavez e kier a desea e hungador nan y nan famia un felis dianan di fiesta.